18 лістапада, Мінск /Кар. БЕЛТА/. Вечар, прысвечаны 1080-годдзю з дня смерці вялікага таджыкскага паэта Абу Абдалаха Рудакі, адбыўся 17 лістапада ў Доме дружбы, паведамляе карэспандэнт БЕЛТА.
Як адзначыў на мерапрыемстве пасол Таджыкістана ў Беларусі Махмадшарыф Хакдод, гэты паэт лічыцца адным з заснавальнікаў таджыкска-персідскай літаратуры. Яго творчасць пакінула вялікі след у сусветнай літаратуры, яна актуальна і цяпер. "Творы Рудакі ўвабралі народную мудрасць і глыбокую філасофію жыцця. Гэты паэт - гонар таджыкскай нацыі", - сказаў дыпламат.
Ён таксама звярнуў увагу на тое, што не так даўно ў Беларусі паспяхова прайшлі Дні культуры і кіно Таджыкістана, якія сталі пацвярджэннем нязменнай дружбы дзвюх краін.
У сваю чаргу пасол Ірана Саід Яры расказаў: творы Рудакі добра ведаюць у Іране і многія любяць яго вершы. На думку іранскага дыпламата, творчасць паэта звязвае людзей, якія ведаюць персідскую мову і літаратуру.
На творчай сустрэчы прагучалі многія творы Рудакі на персідскай, а таксама ў перакладзе на беларускую мову, у тым ліку ў выкананні студэнтаў сталічных ВНУ, членаў Цэнтра адукацыі, навукі і культуры Таджыкістана пры БНТУ.
Абу Абдалах Рудакі нарадзіўся ў 858 годзе ў паселішчы Панджруд (Таджыкістан). Памёр у 941 годзе. У паселішчы Панджруд цяпер знаходзіцца маўзалей Рудакі. Будынак уяўляе сабой шматграннік, увенчаны паўсферычным купалам, які абапіраецца на барабан. Маўзалей пабудаваны з чырвонай цэглы, а купал абліцаваны блакітнай пліткай на манер старажытных сярэднеазіяцкіх і персідскіх мячэцей. У цэнтры будынка ўстаноўлены мармуровы саркафаг над магілай паэта.-0-