17 мая 2024, 18:39

Лукашэнка: хто страляе ў іконы і помнікі, гэта варвары

17 мая, Шуша /Кар. БЕЛТА/. Хто страляе ў іконы і помнікі, гэта варвары. Аб гэтым Прэзідэнт Беларусі Аляксандр Лукашэнка заявіў у час наведвання азербайджанскага горада Шуша, перадае карэспандэнт БЕЛТА.

На прыкладзе Шушы Аляксандр Лукашэнка разам з Прэзідэнтам Азербайджана Ільхамам Аліевым азнаёміўся, як ідзе адраджэнне Карабаха. У горадзе актыўна вядуць аднаўленчыя работы, будуецца жыллё для вяртання азербайджанскіх бежанцаў.

"Не было б шчасця, ды няшчасце дапамагло. Зусім новае жыццё будзе. Вядома, няшчасце дорага абышлося", - адзначыў Аляксандр Лукашэнка.

У Шушы многае нагадвае аб трагічным мінулым: некаторыя дамы ўжо не аднавіць, а памятныя мясціны і храмы разбураны.

"Разваліны гаворачыя... - заўважыў Аляксандр Лукашэнка. - Але дзе можна аднавіць будынкі, трэба аднаўляць".

Дарэчы, спрадвеку Шуша славілася сваім багатым культурным жыццём, літаратурай, музыкай, архітэктурай. У горадзе дзейнічалі розныя літаратурныя і музычныя таварыствы. У 2021 годзе ў Шушы адрадзілі міжнародны фальклорны фестываль "Хары-бюльбюль", у 2024 годзе горад стаў культурнай сталіцай ісламскага свету. У сувязі з гэтым частка праграмы была прысвечана знаёмству з гісторыка-культурнымі традыцыямі Шушы.

У горадзе аднавілі дом, дзе пражываў вядомы савецкі і азербайджанскі оперны спявак, заснавальнік нацыянальнага музычнага тэатра Муртуза Мешадзі Рза аглы Мамедаў, які атрымаў мянушку Бюль-Бюль (у перакладзе з азербайджанскай "салавей").

Цяпер на гэтым месцы музей, прысвечаны выканаўцу. Побач можна ўбачыць бюст Бюль-Бюля. Ён быў устаноўлены яшчэ ў савецкія гады, а пасля - расстраляны і дэманціраваны. Да 2021 года бюст захоўваўся ў палацы Азербайджанскага музея мастацтваў, а потым яго вярнулі ў Шушу.