ДЗЯРЖОРГАНЫДЗЯРЖОРГАНЫ
Флаг Аўторак, 25 студзеня 2022
Мінск 0°C
Усе навіны
Усе навіны
Культура
18 лістапада 2021, 15:53

Шаранговіч: трыенале "Канцэпт" фарміруе творчае поле для мастакоў розных пакаленняў

Фота з архіва
Фота з архіва

18 лістапада, Мінск /Кар. БЕЛТА/. Трыенале "Канцэпт" фарміруе творчае поле для майстроў розных пакаленняў. Аб гэтым заявіла сёння журналістам першы намеснік старшыні Беларускага саюза мастакоў мастацтвазнавец Наталля Шаранговіч у час прэс-канферэнцыі, прысвечанай адкрыццю першага трыенале "Канцэпт". Праект прадставяць сёння ў Рэспубліканскай мастацкай галерэі "Палац мастацтва", перадае карэспандэнт БЕЛТА.

"Фестываль сталі рыхтаваць яшчэ ў пачатку года і атрымалі водгук: колькасць заявак, пададзеных на ўдзел, была вялікай, - расказала Наталля Шаранговіч. - Калі рыхтавалі праект, хацелася паказаць, што ў Беларусі ёсць шмат аўтараў, якія гавораць на нетрадыцыйнай мове, у якой ёсць шмат эксперыментаў і нечаканая пластыка".

У трыенале прымаюць удзел каля 200 аўтараў. У экспазіцыі будуць размешчаны як асобныя работы, так і цэласныя праекты ў розных жанрах і тэхніках выяўленчага і дэкаратыўна-прыкладнога мастацтва. Да ўдзелу запрошаны як прафесійныя мастакі, так і студэнты і ўсе жадаючыя, якія прайшлі папярэдні адбор Беларускага саюза мастакоў. Кожная з работ прадстаўляе асобныя канцэпты, у якіх ёсць эксперыменты з формай, пластыкай, колерам, святлом, гульня з сэнсам і зместам. Гледачоў чакаюць метамарфозы, трансфармацыі, актуалізацыі і ператварэнні. Публіцы прадставяць работы вядомых і маладых беларускіх аўтараў з Мінска і ўсіх рэгіёнаў Беларусі.

"Саюзу мастакоў важна было выступіць каталізатарам працэсу. Наша роля заключалася ў тым, што мы ўкідваем ідэю і знаходзім сабе партнёраў. Хацелася сфарміраваць пэўнае творчае поле, каб у ім удзельнічалі мастакі розных пакаленняў. Моладзь, якая толькі пачынае ўдзельнічаць у нашых праектах, атрымлівае дадатковы стымул. Можна ўбачыць, з чаго ўсё пачалося і да чаго прыйшло, - расказала Наталля Шаранговіч. - Калі мы гаворым аб канцэптуальным мастацтве, то разумеем, што ў Беларусі ў чыстым выглядзе яго няма. У нас жа няма як такой традыцыі або школы. Тым не менш ёсць вельмі шмат мастакоў, якія хочуць эксперыментаваць з тэхнікай, пластыкай, тэмай. А гэта ўжо выхад у іншую прастору, паралельную рэальнасць у мастацтве, што цікава гледачам і самім мастакам".

Намеснік начальніка галоўнага ўпраўлення - начальнік упраўлення прафесійнага мастацтва Міністэрства культуры Марыя Нецвятаева адзначыла, што ў сучасным мастацтве вялікая роля адведзена куратару. "У нашым выпадку работу куратара ўзяў на сябе Беларускі саюз мастакоў, і гэта вялікая праца, якая не застанецца незаўважанай гледачом. Яму будзе здавацца, што ўсё арганічна ў прасторы, дзе будуць экспанавацца творы. Аднак зразумець, якая за гэтым стаіць работа, дастаткова цяжка, калі ты з гэтым ніколі не сутыкаўся. Важна, што такія маштабныя праекты ў першую чаргу заклікаюць да дыялогу. Цяпер трыенале - гэта праект, які выводзіць на дыялог аб сучасным беларускім мастацтве", - сказала яна.

У Палацы мастацтва наведвальнікі могуць азнаёміцца і з цэласнымі праектамі асобных аўтараў. Напрыклад, арт-праект Luminarium гродзенскага мастака Аляксандра Балдакова прадстаўляе серыю арт-аб'ектаў, графічных кампазіцый і прасторавых структур, аб'яднаных аптычнымі якасцямі святла і яго мастацкай трансфармацыяй. Праект "Залежнасць" віцебскай мастачкі Валянціны Ляховіч, рэалізаваны Віцебскім цэнтрам сучаснага мастацтва, прадэманструе жывапіс і канцэптуальныя аб'екты ў стылістыцы трэш-арт.

Цэнтральная экспазіцыя ў Палацы мастацтва прадоўжыцца з 19 лістапада па 16 снежня.

Асобныя выставы праекта адкрыюцца і на іншых пляцоўках сталіцы ў фармаце фестывалю мастацтва. Так, 19 лістапада ў мастацкай галерэі Міхаіла Савіцкага адкрыецца выставачны праект Designatum (скульптура, графіка). 25 лістапада ў Нацыянальнай бібліятэцы Беларусі прэзентуюць экспазіцыю Movement. Гарадская мастацкая галерэя твораў Л.Д. Шчамялёва з 1 снежня запрашае ўбачыць выставу беларускага мастака-авангардыста "Аляксандр Салаўеў. Як есць". 8 снежня ў арт-гасцёўні "Высокае мѣста" прадставяць эксперыментальны тэкстыль Tex-experience.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі