11 снежня, Мінск /Кар. БЕЛТА/. Пасяджэнне Савета Міністраў Саюзнай дзяржавы пройдзе 13 снежня ў Брэсце з удзелам прэм'ер-міністра Беларусі Сяргея Румаса і старшыні ўрада Расіі Дзмітрыя Мядзведзева, паведамілі карэспандэнту БЕЛТА ў прэс-службе беларускага ўрада.
На парадку дня пасяджэння 25 пытанняў. Сярод тэм - гандлёва-эканамічнае супрацоўніцтва Беларусі і Расіі, выкананне прыярытэтных напрамкаў і першачарговых задач далейшага развіцця СД на сярэднетэрміновую перспектыву на 2018-2022 гады, праект саюзнай Ваеннай дактрыны, прагнозныя балансы попыту і прапанавання аграхарчовай прадукцыі і індыкатыўныя балансы паліўна-энергетычных рэсурсаў на 2019 год.
Увагу ўдзеляць пытанням, якія датычацца фарміравання бюджэту, развіцця малога і сярэдняга прадпрымальніцтва, новых саюзных праграм, прэміі СД у галіне навукі і тэхнікі.
Прапануецца разгледзець, як выконваюцца рашэнні Вышэйшага Дзяржсавета аб узаемадзеянні ў сферы машынабудавання і АПК, аб адмене роўмінгу на тэрыторыі Саюзнай дзяржавы, а таксама ўдзеле СД у фінансаванні стварэння музея-сядзібы Дастаеўскага ў Брэсцкай вобласці і Ржэўскага мемарыяла савецкаму салдату ў Цвярской вобласці.
Па выніках пасяджэння прадугледжваецца падпісанне шэрага дакументаў, у тым ліку міжурадавага пагаднення Беларусі і Расіі аб узаемным прызнанні віз.
Тавараабарот Беларусі і Расіі за студзень-кастрычнік склаў $29,6 млрд, павялічыўшыся ў параўнанні з аналагічным перыядам мінулага года на 12,7 працэнта. Расія прадаўжае заставацца асноўным гандлёвым партнёрам Беларусі: на яе долю ў студзені-кастрычніку прыпала 49,6 працэнта вартаснага аб'ёму знешняга гандлю таварамі, 38,3 працэнта экспарту, 59,5 працэнта імпарту (у студзені-кастрычніку 2017 года доля Расіі ў знешнім гандлі Беларусі з усімі краінамі свету складала 51,4 працэнта, у экспарце - 45,1 працэнта, імпарце - 56,9 працэнта).-0-
