"Узнагарода за ўпартасць і майстэрства". Кіраўнік НАК павіншаваў каманду весляроў з пяццю медалямі ЧС

25 жніўня, Мінск /Кар. БЕЛТА/. Прэзідэнт НАК Беларусі Віктар Лукашэнка павіншаваў нацыянальную каманду па веславанні на байдарках і каноэ з паспяховым выступленнем на чэмпіянаце свету ў Мілане. Аб гэтым паведамілі БЕЛТА ў прэс-службе НАК.

У актыве нашай каманды пяць медалёў: адзін залаты, два сярэбраныя і два бронзавыя. Сусветнае чэмпіёнства на дыстанцыі 5000 м заваявала канаістка Вольга Клімава, якая разам з Ангелінай Барданоўскай, Вікторыяй Несцярэнка і Лізаветай Прымак стала другой у чацвёрцы на 500 м. У каноэ-двойцы на 200 м таксама серабро ўзялі Юлія Трушкіна і Іна Нядзелькіна.

"Пяць медалёў сусветнага форуму - заслужаная ўзнагарода за ўпартасць, зайздроснае майстэрства і штодзённую сумесную работу кожнага спартсмена і трэнера. Нашы весляры чарговы раз парадавалі балельшчыкаў у роднай Беларусі, прадэманстраваўшы свой найвышэйшы ўзровень і даказаўшы, што займаюць дастойнае месца сярод лідараў планеты ў гэтым відзе спорту", - адзначыў кіраўнік НАК.

Бронзавыя медалі выйгралі Ілья Верашчака, Станіслаў Савельеў, Уладзіслаў Палешка і Даніла Верашчака (каноэ-чацвёрка, 500 м), а таксама Маргарыта Ткачова, Уладзіслава Скрыганава, Іна Саўчук і Надзея Кушнер (байдарка-чацвёрка, 500 м).-0-