Задаволена стабільнасцю рэзультатаў у сектары для кіданняў, сказала карэспандэнту БЕЛТА беларуская кідальніца молата Ганна Малышчык, якая заняла на Алімпіядзе 7-е месца.
Беларуска ў вырашальнай стадыі спаборніцтваў толькі ў трэцяй спробе змагла паказаць рэзультат (70 м 38 см), які даў магчымасць ёй прадоўжыць барацьбу за ўзнагароды, а заключны выхад у сектар у яе атрымаўся лепш за ўсё - 71 м 90 см. "Задаволена стабільнасцю рэзультатаў у сектары. Усе спробы былі ў раён 70-71 м. Улічваючы, што не маю вялікага вопыту выступленняў на такіх вялікіх стартах, засмучацца сёння няма прычыны. З трэнерам правільна правялі падрыхтоўку, і ўсё атрымалася. Хоць перад трэцім выхадам у сектар быў варыянт, што не траплю ў васьмёрку мацнейшых, але ў мяне часта так здараецца. Добра раблю або першую, або апошнюю спробы. Напрыклад, у заключным выхадзе і зусім наблізілася да свайго лепшага рэзультату - 72 м, паказаўшы 71 м 90 см", - расказала беларуская атлетка.
Золата ў фінале жаночага кідання молата выйграла полька Аніта Уладарчык. Лідар сусветнага сезона ў гэтым відзе ў трэцяй спробе кінула снарад на 82 м 29 см, што з'яўляецца новым сусветным рэкордам. "Рада, што ўдалося прыняць удзел у фінале побач з такімі моцнымі спартсменамі. На ўласныя вочы ўбачыла дасягненне полькі. Для мяне, маладой спартсменкі, гэта вельмі важна. Таксама як і спаборнічаць з тымі ж амерыканкамі, вельмі цікава. У мяне яшчэ невялікі вопыт міжнародных выступленняў, але, спадзяюся, сваім не самым дрэнным рэзультатам у фінале Алімпіяды адкрыю дарогу да найбольш важных дарослых стартаў у кіданні молата", - сказала Ганна Малышчык.
