21 кастрычніка, Мінск /Кар. БЕЛТА/. Спад эканомікі краін Еўропы ў 2020 годзе пад уплывам наступстваў распаўсюджвання COVID-19 ацэньваецца ў памеры 7 працэнтаў, страты ВУП еўрапейскіх дзяржаў складуць 3 трлн еўра. Аб гэтым паведаміў дырэктар еўрапейскага дэпартамента Міжнароднага валютнага фонду (МВФ) Альфрэд Камер, прадстаўляючы рэгіянальны даклад, прысвечаны эканамічнай сітуацыі ў Еўропе, паведамляе ТАСС.
"Мы прагназуем зніжэнне ВУП Еўропы ў 2020 годзе на 7 працэнтаў. Выхад з гэтага крызісу будзе нераўнамерным і частковым. Хоць, паводле прагнозаў, рэальны ВУП вырасце на 4,7 працэнта ў 2021 годзе, ён усё ж будзе ніжэйшым на 6,3 працэнта ў параўнанні з нашымі прагнозамі, якія агучваліся перад пандэміяй", - адзначыў Альфрэд Камер. Вялікая частка гэтых страт не будзе кампенсавана ў сярэднетэрміновай перспектыве.
Паводле яго слоў, палітыкі павінны рабіць усё магчымае, каб стрымаць пандэмію і эканамічны ўрон ад яе, і дачасна не адмаўляцца ад падтрымкі сваёй эканомікі, каб пазбегнуць паўтарэння памылак сусветнага фінансавага крызісу 2008 года. "Рызыкі застаюцца значнымі і растуць па меры ўзмацнення другой хвалі інфекцыі", - дадаў дырэктар еўрапейскага дэпартамента МВФ.
Успышка выклікаемага каранавіруснай інфекцыяй захворвання была зафіксавана ў канцы 2019 года ў Цэнтральным Кітаі і распаўсюдзілася на большасць краін. 11 сакавіка Сусветная арганізацыя аховы здароўя прызнала яе пандэміяй. Усе краіны і тэрыторыі былі вымушаны прыняць розныя экстранныя меры санітарна-эпідэміялагічнага характару, што прывяло да ўзнікнення глыбокага міжнароднага эканамічнага крызісу. Паводле прагнозу МВФ, у бягучым годзе ў сусветнай эканоміцы будзе зафіксаваны істотны спад у памеры амаль 4,4 працэнта, але яна адновіцца і вырасце на 5,2 працэнта ў наступным годзе.-0-
