Як Беларусь адкрывала далёкую дугу? Ніякай канспіралогіі - толькі факты!

Больш за тыдзень прадаўжаецца вялікая камандзіроўка Прэзідэнта Беларусі Аляксандра Лукашэнкі. М'янма, Аман, Алжыр, а перад гэтым Кыргызстан - маршрут уражвае. На Захадзе разважаюць, навошта Лукашэнка паляцеў на Усход. А між тым адказ даўно вядомы: шматвектарнасць - прыярытэт знешняй палітыкі нашай краіны. І далёкая дуга - адзін з самых перспектыўных і цікавых вектараў. Такой пазіцыі беларуская дзяржава прытрымлівалася заўсёды. М'янма і Алжыр - кропкі на дыпламатычнай карце для нас новыя, але нельга сказаць, што невядомыя. Дыялог з гэтымі краінамі вядзецца ўжо не адзін год. Былі розныя перыяды, але супрацоўніцтва ніколі не спынялася. У YouTube-праекце БЕЛТА "Як гэта было. DOC" мы раскажам, як Беларусь адкрывала далёкую дугу, у чым узаемная цікавасць і чаму М'янма і Алжыр не незнаёмцы.

Чаму 2025 год - сапраўды гістарычны?

Восень 2014 года. Прэзідэнт Беларусі Аляксандр Лукашэнка ў Мінску сустракаецца з Мін Аун Хлайнам, на той момант - галоўнакамандуючым Узброенымі сіламі М'янмы. Тады беларускі лідар заявіў, што дыялог Беларусі і М'янмы нацэлены на перспектыву. Дыялог прадоўжыўся праз паўгода, калі ў Мінск прыехаў старшыня Палаты нацыянальнасцей Саюзнага сходу М'янмы Хін Аунг М'інта. Аляксандр Лукашэнка запэўніў, што Беларусь гатова развіваць супрацоўніцтва па ўсіх напрамках - ад падрыхтоўкі грамадзян і ваенных у сістэме адукацыі да супрацоўніцтва ў сельскай гаспадарцы, прамысловасці. Бакі сышліся на думцы - патэнцыял вельмі вялікі, трэба максімальна яго выкарыстоўваць на карысць абедзвюх краін. Тыя перагаворы сталі толькі пачаткам вялікага дыялогу.


Пік супрацоўніцтва прыпаў на 2025 год, які Аляксандр Лукашэнка назваў гістарычным у адносінах дзвюх дзяржаў. У лістападзе беларускі лідар упершыню наведаў М'янму з афіцыйным візітам. А да гэтага, у сакавіку 2025 года, з першым афіцыйным візітам Беларусь наведаў старшыня Дзяржаўнага адміністрацыйнага савета, прэм'ер-міністр Рэспублікі Саюз М'янма Мін Аун Хлайн. "Цікавасць у нас вельмі вялікая да М'янмы. Вы маеце многае з таго, у чым мы маем патрэбу. Я думаю, мы будзем карысныя вам. Таму я прапаную вам сур'ёзна вывучыць Беларусь у плане напрамкаў і развіцця нашай краіны - прамысловасць, сельскую гаспадарку, лагістыку. Калі вы штосьці ўбачыце карыснае для вас, ведайце, што мы заўсёды з вамі і гатовы рэалізаваць вашы інтарэсы", - падкрэсліў на перагаворах Аляксандр Лукашэнка.


Вынікі дамоўленасцей кіраўнікоў дзяржаў доўга не прымусілі сябе чакаць. Ужо ў лістападзе ў Янгоне адбыўся беларуска-м'янманскі бізнес-форум. Кантрактаў заключана на $ 9 млн! Бакі дамовіліся аб стварэнні зборачнай вытворчасці трактароў BELARUS у М'янме. Акрамя таго, прадстаўнікі беларускага і м'янманскага бізнесу дамовіліся аб арганізацыі продажаў і сэрвіснага абслугоўвання. Таксама падпісаны кантракт на пастаўку 400 трактаракамплектаў. Прынята рашэнне аб пастаўках у М'янму лекавых прэпаратаў вытворчасці РУП "Белмедпрэпараты" і УП "Мінскінтэркапс". І гэта толькі пачатак. Але які яскравы!

Якія дзверы адкрывае Алжыр?

Прэзідэнт Беларусі наведваў з афіцыйнымі візітамі Зімбабвэ, Кенію, Экватарыяльную Гвінею і іншыя краіны Афрыканскага кантынента. У Алжыры да 2025 года не быў. Але гэта не значыць, што супрацоўніцтва з гэтай краінай не развівалася.

Зацікаўленасць у Алжыры была даўно. Эфектыўна развіваць яго перашкаджалі аб'ектыўныя фактары - грамадзянская вайна ў Алжыры, пандэмія каранавіруса ў свеце. Але нават у такіх складаных умовах беларуска-алжырскі дыялог вёўся. У 2018 годзе ў мэтах аднаўлення гандлёва-эканамічных адносін Беларусь наведаў міністр замежных спраў Алжыра Абдэлькадэр Месахель. "Той узровень адносін, які ў нас існуе з вашай дружалюбнай краінай, нельга прызнаць здавальняючым. Тым больш на фоне спаду гандлёва-эканамічных сувязей. У гэтым і ваша, і наша віна", - сказаў тады Аляксандр Лукашэнка.
Над вырашэннем праблемы бакі сталі працаваць сумесна. Веласіпед ніхто не стаў вынаходзіць - напрамкі супрацоўніцтва традыцыйныя, тыя, у якіх ёсць кампетэнцыі і ўзаемная цікавасць. Абмяркоўваецца прамысловая кааперацыя, пастаўкі тэхнікі і прадуктаў харчавання, узаемадзеянне ў сельскай гаспадарцы, фармацэўтыцы і інфармацыйна-камунікацыйных тэхналогіях.

Алжыру, як і іншым афрыканскім краінам, трэба вырашыць праблему харчовай бяспекі. І Беларусі ёсць што прапанаваць. Алжыр - вельмі вялікая дзяржава на Афрыканскім кантыненце. Вялізны рынак і выхад на рынкі іншых афрыканскіх краін - магчымасці, якія нельга ўпусціць і якія нельга недаацэньваць. Прэзідэнт аб гэтым нагадвае рэгулярна: "Не трэба думаць, што Афрыка - суцэльная беднасць і там плаціць няма чым. Нічога падобнага! Без рэсурсаў гэтага кантынента свет сёння не можа дынамічна развівацца. Мы не павінны ўпусціць свае магчымасці ў канкурэнтнай барацьбе за афрыканскія рынкі. Тут наперадзе вялікая і напружаная работа". Гучыць вельмі актуальна, праўда? А агучаны гэты тэзіс быў у 2017 годзе на нарадзе па прыярытэтах знешняй палітыкі.

А што з Аманам?

Добрыя станоўчыя прыклады супрацоўніцтва з краінамі Афрыкі ўжо ёсць. Адзін з іх - Аман, які таксама ўключаны ў маршрут вялікай камандзіроўкі Прэзідэнта. Быў час, калі сувязі паміж Беларуссю і Аманам былі развіты слаба. Але актыўная работа дыпламатаў, асабістыя сяброўскія адносіны кіраўнікоў дзяржаў зрабілі сваю справу. У 2024 годзе Аляксандр Лукашэнка наведаў Аман з рабочым візітам, тады на вышэйшым узроўні кропкава абмяркоўвалася супрацоўніцтва ў розных сферах. І ўвесь гэты час бакі актыўна працавалі. Сёння Аман - важны партнёр для Беларусі на далёкай дузе. Гэта перспектыўны хаб для беларускіх тавараў у рэгіёны Паўночнай Афрыкі і Персідскага заліва. У Амане ёсць цікавасць да беларускай сельскагаспадарчай прадукцыі, тэхнікі, фармацэўтыкі. Вялікі патэнцыял у турыстычнай сферы. Добры імпульс яе развіццю надасць падпісанае пагадненне аб узаемнай адмене віз. І гэта далёка не поўны пералік сфер, у якіх краіны могуць працаваць разам. У кастрычніку 2025 года ў час перагавораў з Султанам Амана Хайсамам бен Тарэкам Аль Саідам кіраўнік дзяржавы запэўніў: Беларусь гатова супрацоўнічаць з Аманам па ўсіх напрамках. Планы - грандыёзныя, а галоўнае - ёсць разуменне, як планы зрабіць рэальнасцю.