Сродкі масавай інфармацыі павінны несці адказнасць за публікацыю сацапытанняў неакрэдытаваных у Беларусі сацыялагічных структур. Такое меркаванне выказаў 3 жніўня старшыня наглядальнага савета Беларускага камітэта маладзёжных арганізацый, аналітык Вадзім Баравік у час анлайн-канферэнцыі "Адкрыты дыялог "Моладзь і выбары: формула адказнасці" на сайце БЕЛТА.
"Я лічу, што сродкі масавай інфармацыі павінны несці адказнасць у тым выпадку, калі публікуюць сацыялагічныя даследаванні структур, якія не прайшлі акрэдытацыю ў камісіі, створанай пры Савеце Міністраў і дзеючай на базе Акадэміі навук, - заявіў эксперт. - Няма акрэдытацыі - не павінны публікаваць",
Паводле яго слоў, структуры, што фінансуюцца звонку, не павінны ўдзельнічаць у палітычным працэсе. "У нас гэта прадугледжвае заканадаўства. Калі структура фінансуецца кім-небудзь, яна заўсёды будзе выконваць заказ. Ніхто нікому проста так грошы не дае. І калі гэта фінансуецца замежнымі грамадскімі арганізацыямі, вы павінны разумець, што гэта звычайныя структуры, якія курыруюцца спецслужбамі. Сёння ён у валюце атрымаў, заўтра любую інфармацыю выдасць. Дзе аб'ектыўнасць?" - сказаў ён.
У сваю чаргу палітычны аналітык Аляксандр Шпакоўскі дадаў, што асобныя сацыялагічныя структуры сцвярджаюць, што ім забараняюць легальна працаваць у Беларусі. "На самай справе, яны самастойна ўхіляюцца ад таго, каб працаваць легальна, таму што не могуць выканаць патрабаванні заканадаўства, - адзначыў ён. - А яны даволі простыя. Для атрымання акрэдытацыі ў камісіі пры Савеце Міністраў неабходна: а) абазначыць крыніцы фінансавання і даследаванні, каб людзі ведалі, у інтарэсах каго яны адказваюць на пастаўленае пытанне і ў інтарэсах якіх структур яны прадастаўляюць інфармацыю; б) неабходна мець у сваім штаце прафесійных сацыёлагаў з адпаведнай адукацыяй і, па магчымасці, з навуковымі ступенямі".
"Калі па другім крытэрыі хоць нейкіх сацыёлагаў у штаце гэтых структур можна знайсці, то па першым крытэрыі, зразумела, для іх выдача інфармацыі аб сапраўдных заказчыках, а гэта часцей за ўсё замежныя фонды, звязаныя непасрэдна з урадамі, а часам са спецыяльнымі службамі замежных дзяржаў, смерці падобна. Гэта адкрывае ўсю сістэму", - дадаў Аляксандр Шпакоўскі.
Паводле яго слоў, часцей за ўсё даследаванні такіх структур публікуюцца напярэдадні важных палітычных кампаній або значных міжнародных падзей. "Напрыклад, збіраецца Вышэйшы дзяржсавет Саюзнай дзяржавы з удзелам прэзідэнтаў або старшынь урадаў, з'яўляецца інфармацыя, што ў беларусаў упаў давер да расійскага кіраўніцтва на 20-30 працэнтаў. Дзе гэта апытальная сетка? Хто бачыў гэтых сацыёлагаў? Хто адказваў на пытанні? Ніхто не ведае", - рэзюмаваў эксперт.
