Сацыяльная справядлівасць немагчыма за чужы кошт. Такое меркаванне карэспандэнту БЕЛТА выказаў кандыдат філасофскіх навук, дацэнт, кіраўнік цэнтра палітычнай і эканамічнай сацыялогіі Інстытута сацыялогіі Нацыянальнай акадэміі навук Беларусі Мікалай Шчокін, каменціруючы выступленне Прэзідэнта на сустрэчы з прадстаўнікамі грамадскасці, беларускіх і замежных СМІ.
"На мой погляд, у некаторых нашых суграмадзян адсутнічае разуменне, што сацыяльная справядлівасць - гэта не толькі атрыманне грамадзянінам падтрымкі ад дзяржавы, але і адказнасць самога грамадзяніна перад дзяржавай і грамадствам, - сказаў эксперт. - Большасць працаздольных людзей уносяць пасільную лепту ў фарміраванне бюджэту краіны пры дапамозе падатковых адлічэнняў. Бюджэтныя сродкі, як вядома, ідуць на ахову здароўя, адукацыю, ЖКГ, грамадскі транспарт, культуру, спорт і г.д., чым карыстаюцца ўсе жыхары рэспублікі, у тым ліку сацыяльныя ўтрыманцы. Такім чынам, яны становяцца спажыўцамі даброт, якія створаны працай іншых людзей. І гэта сацыяльная справядлівасць?!"
"Калі чалавек працаздольны, калі ён можа працаваць, але па суб'ектыўных прычынах ухіляецца ад працы або працуе ў ценевым сектары, то, вобразна кажучы, ён бессаромна садзіцца на шыю грамадству. Ніхто не мае права жыць за кошт іншых, за кошт кожнага з нас. І з гэтага пункту гледжання сацыяльная справядлівасць заключаецца ў выплаце збору на фінансаванне дзяржрасходаў, - упэўнены Мікалай Шчокін. - Тым больш што мясцовыя ўлады маюць права вызваліць ад выплаты гэтага збору тых, хто рэальна знаходзіцца ў цяжкай жыццёвай сітуацыі, а не скардзіцца на цяжкасці ў сацыяльных сетках".
"За любую атрыманую паслугу трэба плаціць, гэта закон жыцця і эканомікі, - рэзюмаваў субяседнік. - Людзі, якія маюць патрэбу ў падтрымцы, гарантавана атрымаюць яе ад дзяржавы і грамадства. Астатнія павінны ўносіць свой уклад - або падаткамі, або зборам на фінансаванне дзяржрасходаў. Трэцяга не дадзена".
