Краевугольнай задачай сістэмы адукацыі застаецца выхаванне маладога чалавека. Аб гэтым заявіла намеснік міністра адукацыі Беларусі Раіса Сідарэнка, выступаючы 3 кастрычніка ў Маскве на IV З'ездзе настаўнікаў і работнікаў адукацыі дзяржаў - удзельніц СНД, перадае карэспандэнт БЕЛТА.
"Аб якаснай адукацыі мы можам гаварыць толькі тады, калі ў выніку засваення адукацыйных праграм, набыцця акадэмічных ведаў, сацыяльных і іншых кампетэнцый са школы, прафтэхліцэя, ВНУ выходзіць адукаваная і творчая асоба, грамадзянін і патрыёт сваёй краіны, - сказала Раіса Сідарэнка. - Згадзіцеся, што выхаванне маладога чалавека, падрыхтоўка яго да жыцця ў грамадстве - краевугольная задача сістэмы адукацыі. Іншага не дадзена".
Раіса Сідарэнка ўпэўнена, што для паспяховага вырашэння такой задачы неабходна стварэнне належных умоў. "Патрабуецца наяўнасць кадраў, неабходнай матэрыяльнай базы, а таксама адпаведных патрабаванням зместу адукацыі і арганізацыі навучання, - адзначыла яна. - Неабходна разуменне таго, чаму і як вучыць: ад настаўніка да міністра".
Намеснік міністра канстатавала, што ў Беларусі вядзецца сістэмная работа па ўдасканаленні адукацыйных стандартаў. А змест новага пакалення падручнікаў пры захаванні іх акадэмічнасці, узмацненні міжпрадметных сувязей і выхаваўчага кампанента нацэлены на засваенне вучнямі практычных навыкаў.
