18 снежня, Кіеў /БЕЛТА - УКРІНФАРМ/. Прэзідэнт Украіны Уладзімір Зяленскі падпісаў закон аб прадаўжэнні да канца 2020 года закона аб асаблівым статусе Данбаса. Аб гэтым сведчыць інфармацыя, размешчаная на сайце Вярхоўнай рады.
На інтэрнэт-старонцы адзначаецца, што 18 снежня дакумент "вернуты з подпісам ад прэзідэнта".
Вярхоўная рада 12 снежня прыняла змяненні ў закон "Аб асаблівым парадку мясцовага самакіравання ў асобных раёнах Данецкай і Луганскай абласцей", згодна з якімі тэрмін яго дзеяння прадоўжаны да 31 снежня 2020 года.
Закон прадугледжвае дадатковыя часовыя магчымасці для рэалізацыі заканадаўчых умоў, накіраваных на мірнае ўрэгуляванне сітуацыі ў асобных раёнах Данецкай і Луганскай абласцей на аснове прынцыпаў і норм міжнароднага права і Статута ААН.
Закон аб асаблівым парадку мясцовага самакіравання на Данбасе быў прыняты ў верасні 2014 года і ўступіў у сілу 18 кастрычніка таго ж года. Тэрмін яго дзеяння заканчваецца 31 снежня 2019 года.
9 снежня ў Парыжы прайшла сустрэча лідараў "нармандскай чацвёркі". У ёй прынялі ўдзел канцлер Германіі Ангела Меркель, прэзідэнт Расіі Уладзімір Пуцін, прэзідэнт Украіны Уладзімір Зяленскі, прэзідэнт Францыі Эмануэль Макрон. Па выніках сустрэчы Уладзімір Зяленскі заявіў, што лічыць аптымальным прадоўжыць яшчэ на год дзеянне закона аб асаблівасцях мясцовага самакіравання ў асобных раёнах Данецкай і Луганскай абласцей.-0-
