Новая арэна, "родны" квест і зорнае асарці. Другі дзень "Марафону адзінства" ў Мазыры

28 снежня, Мазыр /Кар. БЕЛТА/. Другі дзень рэспубліканскай грамадска-культурнай акцыі "Марафон адзінства" праходзіць у Мазыры, паведамілі БЕЛТА ў аргкамітэце.

Гэты суботні дзень з самай раніцы адзначаны адкрыццямі аб'ектаў, якія стануць запамінальнымі падарункамі для ўсяго горада за тры дні да новага года. Абодва - на адной вуліцы - Рыжкова. Гэта мурал "Будучыня Беларусі ў тваіх руках" і фізкультурна-аздараўленчы цэнтр "Палессе-Арэна".

Разам з БЕЛТА можна будзе "пагартаць" анлайн і афлайн старонкі гісторыі і развіцця краіны на розных яе этапах. Паласа для "Беларусь. Узлёт" - у гандлёвым цэнтры "Катапульта", а планшэты "Суверэннай Беларусі" размесцяцца ў новым фізкультурна-аздараўленчым цэнтры.

Падумаць пра важнае, блізкае, смачнае маладым людзям можна будзе на гарадскім квесце "Гэта ўсё маё роднае".

Бліжэй да апоўдня на фуд-корце гандлёвага цэнтра "Катапульта" намечана і "Знакавая сустрэча" з удзелам генеральнага дырэктара Нацыянальнай бібліятэкі Беларусі Вадзіма Гігіна, генеральнага дырэктара ЗАТ "Сталічнае тэлебачанне" Аляксандра Асенкі, футбаліста Аляксандра Глеба, галоўнага рэдактара "Альфа Радыё" Вадзіма Шэпета.

У дзень адкрыцця "Палессе-Арэна" запоўніцца максімальна. На сцэнічным комплексе - калейдаскоп нумароў канцэртнай праграмы "Час выбраў нас". Раскошу балета падораць народныя артысты Беларусі Ірына Яромкіна і Антон Краўчанка, падрыхтавалі шыкоўныя нумары артысты Вялікага тэатра оперы і балета Беларусі. Душэўныя і драйвовыя кампазіцыі выканаюць заслужаны артыст Рэспублікі Беларусь Аляксандр Саладуха, ансамбль "Песняры", арт-група "Беларусы", група Aura і інш. Харэаграфічныя ансамблі і студыі паўднёва-ўсходняга рэгіёна нададуць агранку гэтаму творчаму брыльянту.

Да самага вечара "Палессе-Арэна" будзе заставацца эпіцэнтрам марафону яднаючых падзей. Не адыходзячы ад ФАКу, на паштамце "Марафону" можна будзе адправіць навагоднюю паштоўку са спецыяльным штэмпелем "Марафон адзінства. Мазыр" на патрэбны адрас. Такую акцыю праводзяць арганізатары "Марафону адзінства" і РУП "Белпошта".

Таксама на пляцоўцы перад фізкультурна-аздараўленчым цэнтрам пройдзе акцыя "Я жадаю ў Новы год…" і канцэртна-забаўляльная праграма "Мы разам!" з удзелам артыстаў "Марафону адзінства" і вядомых блогераў. Усе ўдзельнікі акцыі змогуць атрымаць цёплы падарунак, пакінуўшы пажаданне краіне ў Новы год у спецыяльнай фотазоне. Дастаткова здымак з пажаданнем выкласці ў любую сацсетку з хэштэгам #марафонединства і паказаць валанцёрам. У падарунак - фірменны шалік марафону.

Зафіналіць "Марафон адзінства" ў Мазыры і Гомельскай вобласці вячэрняя дыскатэка.-0-