3 чэрвеня, Мінск /Кар. БЕЛТА/. На тэлеканале АНТ выйшла расследаванне аб экстраннай пасадцы самалёта Ryanair, што накіроўваўся рэйсам Афіны-Вільнюс, у Мінску. У фільме аднавілі храналогію падзей, паказалі сведчанні пасажыраў і прызнанні затрыманага Рамана Пратасевіча, паведамляе БЕЛТА.
У расследаванні адзначылі, што 23 мая ў 12.25, калі самалёт яшчэ быў над Украінай, на электронную пошту Нацыянальнага аэрапорта Мінск прыйшло пісьмо аб мініраванні авіяборта. Праз 5 мінут дыспетчары перадалі інфармацыю пілотам - борт якраз увайшоў у паветраную прастору Беларусі - і рэкамендавалі прызямліцца ў Мінску.
Перагаворы паміж імі прадаўжаліся амаль 15 мінут, паралельна камандзір судна звязваўся са сваёй авіякампаніяй і, магчыма, з аэрапортам Вільнюса. За гэты час самалёт паспеў падляцець практычна да граніцы з Літвой.
"За гэтыя 14 мінут ён знаходзіўся ўжо ў раёне Ліды - да дзяржаўнай граніцы крыху больш за 25 км, да аэрапорта Вільнюса - каля 78 км. Boeing 737 ішоў на скорасці 900 км/гадз. Простыя лічбы матэматыкі: за мінуту паветранае судна пралятае 15 км, праз колькі яно павінна было перасекчы дзяржаўную граніцу і апынуцца ў паветранай прасторы Літвы - дзве мінуты. Але камандзір грамадзянскага судна прыняў рашэнне ў гэтым раёне выканаць віраж. Пасля выканання палавіны віражу ён узяў курс у аэрапорт Мінск. Яго ніхто не прымушаў, яму ніхто не даваў каманду, яму толькі рэкамендавалі. Ён мог не выканаць, і яго праз дзве мінуты не было б у паветранай прасторы Беларусі, ён быў бы ў Літве", - адзначыў камандуючы Ваенна-паветранымі сіламі і войскамі проціпаветранай абароны Узброеных Сіл Ігар Голуб.
У 13.24 лайнер спыніўся ў аэрапорце. Пасля надгляду багажу і пасажыраў нічога надзвычайнага выяўлена не было. У расследаванні таксама прадэманстравалі запісы размовы спецыяльных службаў і кадры з відэарэгістратараў машын выратавальнікаў, якія абвяргаюць чуткі аб тым, што нібыта яны былі загадзя прысланы ў аэрапорт.
Паводле інфармацыі тэлеканала, Раман Пратасевіч выйшаў з самалёта адным з апошніх, пасля надгляду ён спакойна прайшоў у аўтобус. Калі ён толькі яшчэ стаяў у чарзе на пашпартным кантролі, раптам у інтэрнэце пачала з'яўляцца інфармацыя аб прымусовай пасадцы самалёта і затрыманні Рамана Пратасевіча. Першым яе апублікаваў у сацыяльных сетках Франак Вячорка. Але нават праз паўгадзіны, калі яго паведамленні разышліся па сродках масавай інфармацыі, Раман Пратасевіч спакойна праходзіў кантроль у аэрапорце.
Хто ведаў, што рэйсам ляціць Раман Пратасевіч? У Беларусі, падкрэсліваюць аўтары фільма, не ведалі і не маглі ведаць гэту інфармацыю. Да даных аб пасажырах доступ ёсць толькі ў трох бакоў: у аэрапортах вылету і прылёту і ў авіякампаніі.
На допыце Раман Пратасевіч заявіў, што ў яго быў даволі напружаны канфлікт з адным чалавекам. І адзіны раз, калі ён паведаміў аб сваім перамяшчэнні, гэта была публікацыя ў рабочым чаце за 40 мінут да вылету ў Вільнюс. "Як толькі я гэта сказаў, я адразу апынуўся ў Мінску. Вось адразу!" - звярнуў увагу абвінавачаны. На яго думку, такое супадзенне не выпадкова.
Магчыма, не выпадковы яшчэ адзін факт: затрыманне беларуса ў мінскім аэрапорце адбылося пасля падрабязнай і гучнай заявы Святланы Ціханоўскай аб гэтым інцыдэнце ў яе Telegram-канале.-0-