Кіраўнік НАК: падтрымка юных талентаў - рэальныя інвестыцыі ў будучае беларускага спорту

15 красавіка, Мінск /Кар. БЕЛТА/. Падтрымка маладых таленавітых атлетаў - гэта рэальныя інвестыцыі ў будучыя поспехі беларускага спорту. Аб гэтым заявіў прэзідэнт Нацыянальнага алімпійскага камітэта Беларусі Віктар Лукашэнка на адкрыцці пятага Нацыянальнага форуму атлетаў у Мінску, перадае карэспандэнт БЕЛТА.

"У гэтым годзе беларускаму НАК споўнілася 35 гадоў, і ў сувязі з гэтым дадзены старт новаму праекту "35 Герояў Будучыні". Яго мэта - падтрымка таленавітых спартсменаў, якія складаюць рэзерв нацыянальных і зборных каманд Беларусі", - адзначыў Віктар Лукашэнка. Сёння з ліку усіх кандыдатаў ва ўзросце ад 15 да 21 года, накіраваных федэрацыямі па відах спорту, найбольш перспектыўныя атлеты атрымалі прызы і грашовыя сертыфікаты на спартыўную падрыхтоўку ў памеры 35 тыс. рублёў на год.
Кіраўнік НАК таксама падкрэсліў, што апошнім часам намецілася станоўчая тэндэнцыя: беларусы і расіяне вяртаюцца на міжнародную арэну і могуць на роўных з калегамі з усяго свету выступаць на турнірах са сваёй нацыянальнай сімволікай. "Гэта вынік нашай пастаяннай работы з міжнароднымі спартыўнымі федэрацыямі, і, спадзяюся, у хуткім будучым усе санкцыі і байкоты будуць адменены. Асобны дзякуй нашым расійскім калегам, якія дапамаглі нам у гэты складаны час, мы і далей будзем разам ісці наперад", - дадаў ён.

Галоўныя тэмы V Нацыянальнага форуму - развіццё асабістага брэнда спартсмена, эфектыўная камунікацыя са СМІ, пабудова паспяховай кар'еры ў спорце і медыя. У праграме - выступленні вядомых спецыялістаў у галіне спорту, журналістыкі і блогінгу. У рамках экспертнай дыскусіі "Спорт насуперак" сваімі думкамі падзеляцца чэмпіёны і прызёры Алімпіяд, чэмпіянатаў свету і Еўропы з Беларусі і Расіі - Дар'я Домрачава, Аляксандр Багдановіч, Ганна Гуськова, Настасся Фесікава і Мікалай Гуляеў. Для юных спартсменаў будуць арганізаваны майстар-класы ад расійскіх і беларускіх алімпійцаў па хакеі, плаванні, фігурным катанні і жаночай барацьбе.