Беларусь мае добрыя перспектывы для развіцця караванінгу. Такое меркаванне карэспандэнту БЕЛТА агучыў старшыня Саюза кемпінгаў Беларусі Уладзімір Рудой.
"Караванінг - вельмі перспектыўны напрамак для нашай краіны, - адзначыў субяседнік. - У Еўропе гэты від турызму набірае ўсё большую папулярнасць". Паводле даных нямецкай асацыяцыі караванінгу, колькасць турыстаў у кемпінгах перасягнула колькасць адпачывальнікаў у гасцініцах. Назіраецца рост гэтага віду бізнесу, у Германіі, напрыклад, ён ацэньваецца прыкладна ў 10-12 працэнтаў у год. "Гэты від адпачынку цалкам даступны і не патрабуе вялікіх укладанняў з боку бізнесу", - канстатаваў Уладзімір Рудой.
У Беларусі напрамак толькі пачынае развівацца. "Аб'ектыўна, умовы для гэтага ёсць: гэта і заканадаўчая база, і льготы для бізнесу. Няма інфармацыі для людзей, што гэтым можна займацца і гэта выгадна", - дадаў ён. На думку Уладзіміра Рудога, стымуляваць развіццё караванінгу могуць візавыя паслабленні, і дзяржава робіць крокі ў гэтым напрамку. "Калі візавыя і мытныя працэдуры будуць спрашчацца, гэта будзе велізарным стымулам для караванінгу, паколькі магчымасці для яго развіцця ў нас значныя", - падкрэсліў старшыня Саюза кемпінгаў.
Пацвярджэнне таго - міжнародны злёт караванераў, які прайшоў гэтымі днямі ў Мінску. У ім прынялі ўдзел амаль 1,2 тыс. кемпераў з 16 краін.
Як расказала адна з удзельніц злёту Наталля Магілка (Украіна), у Беларусь яна прыехала не першы раз. У такім мерапрыемстве ўдзельнічала два гады таму ў Брэсце і засталася вельмі задаволена адпачынкам. На гэты раз прыехала з сям'ёй і дзецьмі. "Свае ўражанні ад Беларусі ацэньваем на 5+, спадабалася ўсё: цудоўная прырода, добрыя дарогі, чысцыня прыдарожнай паласы, цёплы прыём. Больш за ўсё эмоцый ад наведвання Белавежскай пушчы. Абавязкова будзем рэкамендаваць сябрам наведаць вашу краіну", - сказала яна.
Караванер з Расіі Максім Аўчыннікаў назваў падарожжа па Беларусі не толькі цікавым, але і камфортным. "Дастаткова аўтазаправачных комплексаў, на якіх пачынаюць ужо ўтварацца месцы для кароткатэрміновай стаянкі аўтамабіляў караванераў, дзе забяспечаны заліў халоднай вадой, падключэнне да электраэнергіі. Учора мы купаліся ў аквапарку, і нам не трэба нікуды пераязджаць, думаць, дзе мы будзем начаваць, шукаць гасцініцы. Мы спакойна прыйшлі, засталіся на начоўку ў сваім доміку. Сёння прадоўжым падарожжа, атрымліваючы новыя ўражанні ад вашай цудоўнай краіны", - падзяліўся турыст.
