29 чэрвеня, Мінск /Кар. БЕЛТА/. Дзень электратранспарту пройдзе ў Кітайска-беларускім індустрыяльным парку "Вялікі камень" 16 ліпеня, паведамілі БЕЛТА ў прэс-службе Міністэрства энергетыкі.
"Мерапрыемства збярэ шырокае кола прадпрыемстваў і кампаній, дзейнасць якіх звязана з электратранспартам, прадстаўнікоў прамысловага комплексу, вучоных, кампаній - імпарцёраў электрамабіляў", - расказалі ў прэс-службе.
Традыцыйна ў дзень правядзення Дня электратранспарту будзе працаваць дэманстрацыйная пляцоўка, дзе будзе прадстаўлена электрамабільная тэхніка, а таксама элементы кампанентнай базы для электрамабіляў. Сярод удзельнікаў выстаўкі - Аб'яднаны інстытут машынабудавання НАН Беларусі, прыборабудаўнічы завод "Аптрон", BKM Holding, МАЗ, МТЗ, рэзідэнты Кітайска-беларускага індустрыяльнага парка "Вялікі камень", ВА "Беларуснафта", кампаніі "БЕЛДЖЫ", Green Сars, "РЭНЕРА" і іншыя.
Наведвальнікі выстаўкі таксама змогуць азнаёміцца з мадэльным радам індывідуальных электратранспартных сродкаў - электраматацыкламі, электравеласіпедамі і электраскутарамі. Праграма мерапрыемства ўключае тэст-драйвы, спаборніцтвы для аматараў язды на манаколах, заезд дзіцячых гоначных электракартаў, які будзе арганізаваны дзяржкарпарацыяй "Расатам".
Дзень электратранспарту накіраваны на папулярызацыю электратранспарту як перспектыўнага, экалагічна чыстага віду транспарту. Дадатковыя магчымасці для развіцця галіны створаны з уводам у прамысловую эксплуатацыю першага энергаблока Беларускай атамнай электрастанцыі.
Арганізатарамі мерапрыемства выступаюць Міністэрства энергетыкі і Кітайска-беларускі індустрыяльны парк "Вялікі камень".-0-
