11 чэрвеня, Мінск /Кар. БЕЛТА/. Латгальскі акруговы суд пастанавіў спагнаць 66,8 млн еўра з расійска-латвійскай кампаніі LatRosTrans (ТАА "ЛатРасТранс") на карысць ААТ "Полацктранснафта Дружба" па спрэчцы аб тэхналагічнай нафце. Гэту інфармацыю пацвердзілі карэспандэнту БЕЛТА на беларускім прадпрыемстве.
Суд пастанавіў спагнаць 66 млн 861 тыс. 649 еўра. Гэта сума ўключае кошт тэхналагічнай нафты (66 млн 744 тыс. еўра), а таксама дзяржпошліну ў памеры 66 тыс. еўра і судовыя расходы, адзначылі ў ААТ "Полацктранснафта Дружба".
Судовая спрэчка ўзнікла ў 2010 годзе, калі LatRosTrans вырашыла зліць нафту з нафтаправода, нягледзячы на існуючыя дакументы аб прыналежнасці гэтай нафты ААТ "Полацктранснафта Дружба". Пасля гэтага беларускае прадпрыемства звярнулася ў суд. Прадметам спрэчкі была тэхналагічная нафта, якая знаходзілася ва ўчастках магістральных нафтаправодаў Полацк-Вентспілс і Полацк-Біржай-Мажайкяй, што праходзяць па тэрыторыі Латвіі і прыналежаць цяпер LatRosTrans.
Судовая справа дайшла да Вярхоўнага суда Латвіі, які ў снежні 2016 года прыняў рашэнне аб накіраванні справы ў ніжэйшую інстанцыю для паўторнага разгляду.-0-
