17 чэрвеня, Мінск /Кар. БЕЛТА/. На футбольных арэнах Італіі стартаваў 22-і чэмпіянат Еўропы сярод маладзёжных каманд (U-21), паведамляе карэспандэнт БЕЛТА.
Гаспадары фінальнага этапу італьянцы ў стартавым матчы атрымалі валявую перамогу над равеснікамі з Іспаніі з лікам 3:1. Прапусціўшы гол на 9-й мінуце гульні, італьянскія футбалісты яшчэ да перапынку зраўнавалі лік, а ў другой палове двойчы паразілі вароты сапернікаў. Галявы дубль у гэтай сустрэчы аформіў Федэрыка К'еза. У другім паядынку папярэдняй групы А польскія футбалісты таксама спачатку ўступалі, прапусціўшы мяч ад бельгійцаў на 16-й мінуце. Затым палякі забілі тры разы запар, на што сапернікі адказалі адным голам - 3:2 на карысць польскай "маладзёжкі".
Сёння ў барацьбу ўступяць каманды групы В - зборная Германіі згуляе з Даніяй, аўстрыйцы сустрэнуцца з сербамі. У аўторак, 18 чэрвеня, адбудуцца два паядынкі ў групе С: Англія - Францыя, Румынія - Харватыя.
Пасля завяршэння групавога этапу ў паўфінал выйдуць пераможцы трох груп і лепшая з каманд, што занялі другія месцы. Паўфінальныя матчы адбудуцца 27 чэрвеня, пераможцы якіх 30 чэрвеня ва Удзіне сустрэнуцца ў вырашальным паядынку за чэмпіёнскі тытул.
Першае маладзёжнае першынство Старога Свету адбылося ў 1972 годзе, яно праводзіцца раз у два гады. На мінулым чэмпіянаце, што праходзіў у Польшчы, золата заваявалі футбалісты Германіі, якія абыгралі ў фінале іспанцаў з лікам 1:0.
Самай тытулаванай на кантыненце з'яўляецца італьянская "маладзёжка", якая 5 разоў станавілася чэмпіёнам Еўропы, 4 залатыя ўзнагароды ў іспанцаў, тры разы перамагала каманда Савецкага Саюза, па два разы турнір выйгравалі футбалісты Англіі, Германіі і Нідэрландаў.-0-
