23 лістапада, Мінск /Кар. БЕЛТА/. Баскетбалісткі "МІНСКА" пасля пяцігадовага перапынку заваявалі Кубак Беларусі сярод жаночых каманд, паведамляе карэспандэнт БЕЛТА.
Сёння ў вырашальным паядынку 29-га кубкавага розыгрышу падапечныя Вольгі Падабед упэўнена абыгралі гродзенскую "Алімпію" з лікам 68:50. Для "МІНСКА" гэта шосты кубкавы трафей у гісторыі. Учора ў паўфінале мінчанкі з рэзультатам 79:56 разграмілі баскетбалістак "Гарызонта", якія выйгравалі Кубак пяць папярэдніх сезонаў запар.
На гэты раз каманда Наталлі Трафімавай стала ўладальнікам бронзавых узнагарод кубкавага турніру, перамогшы ў матчы за трэцяе месца маладзёжную каманду БК "МІНСК" з лікам 71:55.
"Фінал чатырох" мужчынскага Кубка Беларусі пройдзе на наступным тыдні. У суботу, 29 лістапада, у паўфіналах на паркеце сталічнага спартыўнага комплексу РДВАР дзеючы ўладальнік трафея "Гродна-93" згуляе з баскетбалістамі "МІНСКА", а магілёўскі "Барысфен" будзе сапернічаць з віцебскім "Рубонам". Медальныя паядынкі мужчынскага кубкавага розыгрышу адбудуцца 30 лістапада.-0-
Фота Сяргея Шэлега
Падпісвайцеся на нас у
