ДПК: перад выхаднымі каля 4,8 тыс. фур чакаюць на граніцы ўезду ў ЕС

31 кастрычніка, Мінск /Кар. БЕЛТА/. Каля 4,8 тыс. фур чакаюць на граніцы ўезду ў ЕС перад выхаднымі. Аб гэтым БЕЛТА паведамілі ў Дзяржпагранкамітэце.

"30 кастрычніка Дзяржпагранкамітэт атрымаў афіцыйнае паведамленне ад улад Літвы аб парадку работы пунктаў пропуску "Мядзінінкай" (сумежны "Каменны Лог") і "Шальчынінкай" (сумежны "Беняконі")", - падкрэслілі ў беларускім пагранічным ведамстве.

Самы загружаны маршрут для грузавікоў праходзіць праз польскі пагранічны пераход "Кукурыкі" (сумежны "Казловічы"), дзе ўезду чакаюць 2920 фур. За мінулыя суткі сумежны бок прыняў на сваю тэрыторыю 62 працэнты аўто ад нормы.

Кантралюючыя службы "Мядзінінкая" за 24 гадзіны прапусцілі на сваю тэрыторыю 12 працэнтаў велікагрузаў. Перад літоўскімі пагранічнымі пераходамі знаходзіцца 1240 грузавікоў.

Праз латвійскі пункт пропуску "Патэрніекі" (сумежны "Грыгароўшчына") у Еўрасаюз прайшло 30 працэнтаў фур. У чарзе тут знаходзіцца 610 велікагрузаў.

Уезду ў польскі "Цярэспаль" (сумежны "Брэст") чакаюць 1110 легкавушак і 70 аўтобусаў. Сумежны бок прыняў на сваю тэрыторыю толькі 38 працэнтаў аўто.-0-