9 кастрычніка, Мінск /Уладзімір Мацвееў - БЕЛТА/. Міністр абароны Азербайджана Закір Гасанаў адзначае высокую якасць узбраення і тэхнікі беларускай вытворчасці. Аб гэтым ён заявіў сёння журналістам пасля сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
"Ваенна-тэхнічнае супрацоўніцтва мы ацэньваем вельмі высока. Гэта выдатная беларуская якасць. Узброеныя Сілы Азербайджана карыстаюцца ўзбраеннем і тэхнікай беларускай вытворчасці, і я з поўнай адказнасцю заяўляю, што гэта высакаякаснае ўзбраенне і абсталяванне ваеннага прызначэння. У гэтым пытанні мы лічым, што ў нас ёсць яшчэ магчымасці пашырыць супрацоўніцтва. Канкрэтыку мы абмяркоўвалі з адпаведнымі службовымі асобамі", - заявіў міністр.
Ён даў высокую ацэнку вынікам сустрэчы з кіраўніком беларускай дзяржавы, на якой па ўсіх абмеркаваных пытаннях "было дадзена зялёнае святло". "Мы будзем у гэтым плане ў ваеннай сферы супрацоўнічаць яшчэ больш і канкрэтна", - адзначыў Закір Гасанаў.
Міністр таксама падкрэсліў дружалюбны характар адносін паміж Беларуссю і Азербайджанам. "Як і ў іншых галінах, у ваеннай сферы супрацоўніцтва ў нас таксама актыўна развіваецца. Гэта і пытанні абмену вопытам, ваеннага будаўніцтва, ваенна-тэхнічнае супрацоўніцтва", - сказаў ён.-0-
