24 чэрвеня, Нясвіж /Аліна Грышкевіч - БЕЛТА/. Германія актыўна падтрымлівае пашырэнне сувязей па лініі Беларусь-ЕС. Такі пункт гледжання выказаў Надзвычайны і Паўнамоцны Пасол Германіі ў Беларусі Петэр Дэтмар сёння на сустрэчы гарадоў-пабрацімаў Беларусі і Германіі, што праходзіць у Нясвіжы, паведамляе карэспандэнт БЕЛТА.
Пасол адзначыў, што адносіны па лініі Беларусь - ЕС адчувальна палепшыліся. "Найбольш відавочным сведчаннем таго стала адмена санкцый ЕС у адносінах да Беларусі ў лютым бягучага года. Менавіта Германія больш за іншыя краіны выступала за адмену санкцый", - сказаў дыпламат.
Паводле яго слоў, з канца 2015 года істотна павысіўся ўзровень афіцыйных кантактаў паміж дзяржавамі Еўрапейскага саюза і Беларуссю, у прыватнасці, паміж Германіяй і Беларуссю. "Можна канстатаваць, што нават праблемныя тэмы могуць зноў адкрыта абмяркоўвацца, - адзначыў Петэр Дэтмар. - Гэта можа стаць пачаткам шляху, які дасць нам магчымасць актыўна рэалізоўваць шырокі патэнцыял двухбаковых адносін. Гэта запатрабуе часу, цярпення і даверу да партнёраў. У рэшце рэшт размова ідзе пра людзей у нашых краінах і пра іх будучыню".
Пасол лічыць, што ўклад партнёрскага руху ў пашырэнне беларуска-германскага ўзаемадзеяння з'яўляецца вельмі істотным.
Сустрэча гарадоў-пабрацімаў праходзіць у Нясвіжы 24-25 чэрвеня. Яе тэма - "Беларуска-нямецкае партнёрства гарадоў - масты ў будучыню". На мерапрыемства сабраліся прадстаўнікі амаль 30 нямецкіх і беларускіх гарадоў і раёнаў, якія звязаны пабрацімскім рухам. Бакі акцэнтуюць увагу на развіцці эканамічных, інвестыцыйных кантактаў, укладзе моладзі ў пабрацімскія сувязі. Размова ідзе таксама аб развіцці і абмене вопытам у сацыякультурнай, адукацыйнай і медыцынскай сферах.
Праграмай мерапрыемства прадугледжана наведванне прадпрыемстваў, азнаямленне з інфраструктурай рэгіёна, культурнымі, гістарычнымі, адукацыйнымі аб'ектамі, а таксама наведванне ўстаноў аховы здароўя.-0-
