12 снежня, Мінск /Кар. БЕЛТА/. Зборная Масквы стала пераможцам першага каманднага барцоўскага турніру "Ліга храбрых". Яго арганізавалі Прэзідэнцкі спартыўны клуб і Беларуская федэрацыя барацьбы, паведамляе карэспандэнт БЕЛТА.
У вырашальным матчы за чэмпіёнскі тытул госці з расійскай сталіцы выйгралі ў Мінску ў каманды Магілёўскай вобласці з лікам 17:13.
Бронзавыя ўзнагароды заваявала каманда Мінскай вобласці, якая ва ўпартай барацьбе перамагла зборную Гродзенскай вобласці - 16:14.
Спаборніцтвы, у якіх аб'яднаны тры віды барацьбы - вольная, грэка-рымская і жаночая, - праводзіліся ў Беларусі ўпершыню. У складзе кожнай каманды было па дзесяць спартсменаў (па адным у кожнай вагавой катэгорыі ў трох відах). У залік ішлі рэзультаты паядынкаў у трох відах барацьбы па выніках 30 схватак. Турнір праходзіў па сістэме з прамым выбываннем. У склады каманд уваходзілі юнакі і дзяўчаты 2007-2008 гадоў нараджэння, якія на пастаяннай аснове займаюцца спартыўнай барацьбой. "Ліга храбрых" праводзіцца для папулярызацыі спартыўнай барацьбы, пашырэння спартыўных і дружалюбных сувязей трох відаў барацьбы, фарміравання спартыўнага рэзерву.-0-
