22 лістапада, Мінск /Кар. БЕЛТА/. Беларускія хакеісты не будуць лічыцца легіянерамі ў расійскіх клубах КХЛ. Гэту інфармацыю БЕЛТА пацвердзілі ў Федэрацыі хакея Беларусі.
"Загад Міністэрства спорту Расіі аб адмене статусу легіянераў для беларускіх хакеістаў у расійскіх клубах КХЛ убачыў свет у верасні бягучага года, а ўступіў у законную сілу ў кастрычніку, але дагэтуль у гэтым пытанні не была пастаўлена кропка. Паўза была выклікана тым, што да гэтага часу заставалася не выканана апошняя неабходная працэдура - зацвярджэнне адпаведных змяненняў у рэгламенце чэмпіянатаў КХЛ і МХЛ (апошняя таксама падтрымліваецца Кантынентальнай лігай). Паўнамоцтвы ўносіць змяненні мае Савет дырэктараў КХЛ, пасяджэнні якога ў апошнія месяцы не праводзіліся. Менавіта гэты орган, няхай і не без спроб супраціўлення, надзяляў восенню 2015 хакеістаў з беларускімі пашпартамі статусам легіянераў. Савет дырэктараў сёння на падставе згаданага вераснёўскага загаду расійскага Мінспорту зноў ураўнаваў расіян і беларусаў у правах у расійскіх клубах КХЛ і МХЛ", - гаворыцца ў паведамленні прэс-службы ФХБ.-0-
