26 сакавіка, Шклоўскі раён /Кар. БЕЛТА/. Прэзідэнт Беларусі Аляксандр Лукашэнка даручыў зняць з пасад усіх вінаватых за незабеспячэнне належных умоў гаспадарання і вытворчай дысцыпліны ў аграхолдынгу "Купалаўскае". Адпаведнае даручэнне кіраўнік дзяржавы даў у час рабочай паездкі ў Магілёўскую вобласць, перадае карэспандэнт БЕЛТА.
Аляксандр Лукашэнка наведаў малочнатаварны комплекс "Сліжы" ААТ "Амкадор-Шклоў", дзе яму далажылі аб развіцці ў краіне малочнай галіны, вытворча-эканамічных паказчыках работы прадпрыемства і аграхолдынга "Купалаўскае" ў цэлым. Затым Прэзідэнт вырашыў асабіста азнаёміцца з умовамі ўтрымання буйной рагатай жывёлы і станам вытворчых памяшканняў.
Убачыўшы грубае парушэнне тэхналагічных працэсаў і вельмі нездавальняючыя ўмовы ўтрымання жывёл, кіраўнік дзяржавы запатрабаваў знайсці вінаватых і разабрацца з работай гаспадаркі. "Калі чалавек не разумее, што гэта Асвенцім, а вы яго ставіце кіраўніком холдынга (ТАА "Купалаўскае". - Заўвага БЕЛТА), я вас наогул не разумею", - заявіў Прэзідэнт.
Аляксандр Лукашэнка спытаў, якія ў гаспадаркі ёсць яшчэ базы, і запатрабаваў адвезці яго туды. На механічным двары Прэзідэнт таксама ўбачыў безгаспадарчасць і нядобрасумленнае стаўленне да тэхнікі, нягледзячы на тое, што напярэдадні тэрыторыю правяраў кіраўнік аграхолдынга і там "наводзілі парадак".
На мехдвары ў неналежных умовах захоўваецца непрацуючая тэхніка, якую не могуць адрамантаваць ужо некалькі гадоў, ён захламлены металаломам і старымі запчасткамі. У ангарах - куча зламанага абсталявання. Як аказалася, некаторую тэхніку купілі нядаўна, аднак не скарысталіся ёю, з цягам часу яна стала непрыдатнай. "Вакол могілкі, што на вуліцы, што пад дахам", - канстатаваў Прэзідэнт.
Аляксандр Лукашэнка даручыў зняць з пасад усіх вінаватых за незабеспячэнне належных умоў гаспадарання і вытворчай дысцыпліны ў аграхолдынгу "Купалаўскае" і ўзбудзіць крымінальныя справы. "Каб на стале ляжаў спіс усіх, што мяне тут суправаджаў. Акрамя губернатара і іншых тут яшчэ былі канкрэтныя людзі, якія павінны былі за гэта адказваць, - сказаў кіраўнік дзяржавы. - Леанід Васільевіч (Леанід Анфімаў, старшыня Камітэта дзяржкантролю. - Заўвага БЕЛТА), узбудзіць крымінальную справу з усёй строгасцю закона. Вінаваты - наручнікі і адразу ў следчы ізалятар".
Цяперашняга старшыню Шклоўскага райвыканкама Васіля Віцюнова вырашана назначыць кіраўніком аграхолдынга "Купалаўскае", а памочніка Прэзідэнта па Магілёўскай вобласці Генадзя Лаўранкова - выконваючым абавязкі старшыні райвыканкама. Выконваць абавязкі губернатара Магілёўскай вобласці пакуль будзе яго цяперашні першы намеснік Мікалай Кароцін.
Па іншых службовых асобах Аляксандр Лукашэнка даручыў Адміністрацыі Прэзідэнта ўнесці прапановы ў бліжэйшы час.-0-