11 снежня, Мінск /Кар. БЕЛТА/. Беларусь будзе ўсяляк падтрымліваць Казахстан у стварэнні стабільнай, магутнай і працвітаючай дзяржавы. Аб гэтым заявіў Прэзідэнт Беларусі Аляксандр Лукашэнка на пасяджэнні Вышэйшага Еўразійскага эканамічнага савета, паведамляе карэспандэнт БЕЛТА.
У час пасяджэння выступілі першы Прэзідэнт Казахстана Нурсултан Назарбаеў і кіраўнік казахстанскай дзяржавы Касым-Жамарт Такаеў. Ад Беларусі старшынства ў Еўразійскім эканамічным саюзе на 2021 год пераходзіць якраз да Казахстана.
"У нас быў няпросты высакосны 2020 год, няпросты будзе і 2021 год. Ведаю, што ў Казахстане год пачнецца з парламенцкіх выбараў. Мы хацелі б пажадаць Казахстану поспехаў у правядзенні гэтай палітычнай кампаніі. Тое, што яна будзе няпростай, вы гэта бачыце і па Беларусі, і па іншых краінах, - адзначыў Аляксандр Лукашэнка. - Таму мы будзем балець за вас, будзем усяляк падтрымліваць вас у стварэнні стабільнага, магутнага, працвітаючага Казахстана".
Пасяджэнне Вышэйшага Еўразійскага эканамічнага савета праходзіць у рэжыме відэаканферэнцыі з удзелам кіраўнікоў дзяржаў Еўразійскага эканамічнага саюза, а таксама ганаровага старшыні ВЕЭС, першага Прэзідэнта Рэспублікі Казахстан Нурсултана Назарбаева, Прэзідэнта Рэспублікі Малдова Ігара Дадона, Прэзідэнта Рэспублікі Узбекістан Шаўката Мірзіёева, Прэзідэнта Рэспублікі Куба Мігеля Дыяс-Канеля Бермудэса, старшыні Калегіі Еўразійскай эканамічнай камісіі Міхаіла Мясніковіча.-0-