Серыі банкруцтваў туркампаній у Беларусі не будзе. Такое меркаванне выказаў карэспандэнту БЕЛТА дырэктар Рэспубліканскага саюза турыстычных арганізацый Валянцін Цэхмейстэр, каменціруючы сітуацыю вакол тураператара "Аўрора Тур" і магчымыя вынікі для турыстычнага рынку.
"Зразумець логіку таго, што здарылася, даволі складана. Тураператар "Аўрора Тур" працаваў ужо некалькі гадоў, праблем не ўзнікала. Для беларускага турыстычнага рынку гэта нетыповы выпадак, хоць у сусветным турбізнесе такое здараецца. Да серыі банкруцтваў турфірм або нечага такога гэта сітуацыя не прывядзе", - адзначыў Валянцін Цэхмейстэр. Пакуль вядома аб 20 пацярпелых ад дзеянняў тураператара, але дырэктар РСТА не выключае, што іх можа быць больш.
Складанасць сітуацыі яшчэ і ў тым, што пуцёўкі тураператара "Аўрора Тур" агенты прадавалі не толькі ў Мінску, але і ў іншых гарадах. "Грошы ў турыстаў агенты ўзялі, але адправіць у падарожжа не могуць. Згодна з законам яны павінны пагасіць запазычанасць перад турыстамі, хоць і з'яўляюцца ўсяго толькі турагентамі. І толькі потым праз судовы іск турагент будзе вяртаць грошы ў тураператара", - растлумачыў дырэктар РСТА.
Валянцін Цэхмейстэр лічыць, што ў Беларусі трэба прадумаць механізм страхавання рызык турыста. "Мы пакуль не прыйшлі да цывілізаванага паняцця страхавання рызык падарожніка. Маецца на ўвазе не проста медыцынская страхоўка або страхоўка ад нявыезду, а страхаванне ўсяго падарожжа, усіх дагаворных абавязацельстваў", - растлумачыў ён. Раней у Беларусі прапаноўвалася стварыць фонд экстраннай дапамогі турыстам, але да адзінай думкі па гэтым пытанні прыйсці не ўдалося. "Меркавалася, што гэта мог быць аналаг расійскай "Турдапамогі", аднак відавочна: гэта не ідэальны варыянт", - дадаў дырэктар РСТА.
Як паведамлялася, цяпер міліцыя шукае ўсіх пацярпелых ад дзеянняў тураператара "Аўрора Тур". Пакуль вядома аб 20 такіх грамадзянах. Каб устанавіць усе абставіны здарэння, праваахоўнікі праводзяць праверку.
Міністэрства спорту і турызму гатова кансультаваць усіх пацярпелых і аказваць ім прававую дапамогу. Калі справа дойдзе да суда, спецыялісты ведамства могуць выступіць у якасці экспертаў.
