Больш за 12 тыс. беларускіх школьнікаў падалі заяўку на конкурс для ўдзелу ў "Поездзе Памяці"

6 лютага, Мінск /Кар. БЕЛТА/. Больш за 12 тыс. беларускіх школьнікаў падалі заяўку на конкурс "Я патрыёт сваёй краіны", які праходзіць у рамках праекта "Поезд Памяці". Аб гэтым журналістам расказаў начальнік галоўнага ўпраўлення ідэалагічнай работы і па справах моладзі Мінгарвыканкама Аляксандр Лук'янаў, перадае карэспандэнт БЕЛТА.

"Многія маладыя людзі ва ўзросце 16-17 гадоў, якія цяпер вучацца ў 10-м класе, хочуць стаць удзельнікамі акцыі "Поезд Памяці". Конкурс "Я патрыёт сваёй краіны" (праводзіцца кожны год для адбору дзяцей у склад беларускай дэлегацыі ў рамках праекта "Поезд Памяці") аб'ядноўвае тысячы хлопчыкаў і дзяўчынак. Колькасць дзяцей, якія хочуць прыняць удзел у гэтай акцыі, штогод расце. Калі спачатку гэта былі 5-6 тыс., то цяпер больш за 12 тыс. школьнікаў падалі свае заяўкі на конкурс "Я патрыёт сваёй краіны". Яны будуць ацэнены дзяржаўнай камісіяй у рамках канкурэнтнага адбору. Гэты конкурс дае юнакам і дзяўчатам магчымасць расказаць не толькі пра сваю асабістую гісторыю, пра гісторыю Перамогі і подзвігу сваіх продкаў, але і падзяліцца гісторыяй роднага краю", - сказаў Аляксандр Лук'янаў.

Сёння ў Савеце Рэспублікі Нацыянальнага сходу Беларусі прайшло першае пасяджэнне арганізацыйнага камітэта акцыі "Поезд Памяці". Сярод удзельнікаў пасяджэння - кіраўніцтва Савета Рэспублікі, Беларускай чыгункі, міністэрстваў аховы здароўя, адукацыі, антыманапольнага рэгулявання і гандлю, транспарту і камунікацый, унутраных спраў, намеснікі старшынь аблвыканкамаў і іншыя.

"На пасяджэнні абмяркоўваліся ўсе ключавыя пытанні, звязаныя з правядзеннем гэтага ўнікальнага праекта. У рамках работы аргкамітэта абмяркоўваюцца пытанні, звязаныя з маршрутам, па якім пройдзе "Поезд Памяці", праграмай знаходжання дзяцей. За некалькі тыдняў удзельнікі праекта наведаюць нашы абласныя цэнтры. І для кожнай вобласці гэта шанц паказаць сябе. Акрамя таго, у работу аргкамітэта інтэграваны ўсе зацікаўленыя міністэрствы, ведамствы, канцэрны, якія забяспечваюць камфортнае знаходжанне ўдзельнікаў. Таксама мы актыўна ўзаемадзейнічаем з аргкамітэтам з Савета Федэрацыі Федэральнага сходу Расіі", - адзначыў начальнік галоўнага ўпраўлення.

Ён указаў і на тое, што з кожным годам пашыраецца геаграфія ўдзельнікаў праекта "Поезд Памяці". Першапачаткова ў ім удзельнічалі хлопцы і дзяўчаты з Беларусі і Расіі, у мінулым годзе акцыя аб'яднала школьнікаў з 15 краін. Важным з'яўляецца і той факт, што праект праходзіць пяты раз. "Дзякуючы гэтаму праекту Беларусь дэманструе свой турыстычны і патрыятычны патэнцыял. Бо кожны раз, размаўляючы з дзецьмі, пераконваешся: дні, праведзеныя імі сярод равеснікаў у "Поездзе Памяці" ў час наведвання беларускіх гарадоў, становяцца часам, калі дзеці шчыра ўлюбляюцца ў нашу краіну і завязваюць сяброўскія адносіны, якія захоўваюцца і пасля заканчэння праекта. Менавіта праз такія акцыі мы можам убачыць, якая будзе наша будучыня. Яна закладваецца якраз цяпер - у тых дзецях, якія праз шчырую любоў да Радзімы, глыбокую павагу да яе гісторыі атрымліваюць цудоўную магчымасць узаемадзейнічаць, абменьвацца культурным вопытам", - падкрэсліў Аляксандр Лук'янаў.

Акцыя "Поезд Памяці" традыцыйна стартуе 21 чэрвеня ў мемарыяльным комплексе "Брэсцкая крэпасць-герой", састаў пачне рух па маршруце 22 чэрвеня.-0-