Развіццё сфер турызму ў Беларусі і Расіі павінна быць скаардынавана. Такое меркаванне выказаў дзяржсакратар Саюзнай дзяржавы Рыгор Рапота, адказваючы на пытанне карэспандэнта БЕЛТА ў горадзе Плёс Іванаўскай вобласці ў час прэс-туру беларускіх і расійскіх журналістаў "Плёс - культурна-гістарычны праект і аб'ект падзейнага турызму".
Рыгор Рапота паведаміў, што ў бліжэйшы час у яго запланавана сустрэча з кіраўніцтвам Растурызму, на якой будзе абмяркоўвацца гэта тэма. "Сфера турызму - гэта цэлая сістэма. На прыкладзе таго ж Плёса мы будзем гаварыць аб расійска-беларускім супрацоўніцтве ў сферы турызму, можа, больш глыбока, чым гэта рабілася да гэтага часу", - сказаў ён.
Паводле слоў дзяржсакратара, намечана таксама яго сустрэча з кіраўнікамі беларускага і расійскага турбізнесу. "Мы будзем глядзець, што можна ўзяць лепшага ў турыстычнай сферы дзвюх краін, - адзначыў ён. - Будзем гаварыць аб развіцці сумеснага турызму, неяк трэба аб'ядноўваць гэтыя дзве сістэмы. Тут шмат ідэй. Гэта тэма для размовы не толькі з тымі, хто займаецца турыстычным бізнесам, але і з эканамістамі, транспартнікамі, кіраўнікамі".
Рыгор Рапота перакананы, што турыстычная галіна не толькі сфера развіцця, але і элемент камфортнасці асяроддзя пражывання. "Калі мы палепшым асяроддзе пражывання ў Расіі і Беларусі, зробім яго больш гарманічным, нашы нашчадкі скажуць нам дзякуй", - рэзюмаваў дзяржсакратар Саюзнай дзяржавы.
