Рэакцыя расійскага прэм'ер-міністра Дзмітрыя Мядзведзева на словы Лукашэнкі - вельмі няўмелая спроба зрабіць саюзніцкія адносіны менш папулярнымі. Такое меркаванне 8 лістапада ў праграме "Клуб рэдактараў" на тэлеканале "Беларусь 1" выказаў дырэктар - галоўны рэдактар выдавецкага дома "Беларусь сегодня" Дзмітрый Жук, паведамляе БЕЛТА.
Дзмітрый Жук адзначыў, што заявы былі накіраваны, перш за ўсё, на расійскую аўдыторыю, на тое, каб зрабіць менш папулярнымі ў яе вачах адносіны паміж Беларуссю і Расіяй. Аднак людзі вельмі рацыянальны і ацэньваюць не гэту пену, а рэальныя дзеянні і ўчынкі, дадаў ён. "Мне здаецца, гэта такая вельмі няўдалая, няўмелая спроба паднаціснуць і зрабіць менш папулярнымі саюзніцкія адносіны", - лічыць галоўны рэдактар "Беларусь сегодня".
Ён звярнуў увагу, што такія заявы не новыя на медыйным полі і з'яўляюцца яны звычайна тады, калі ідзе фінальная фаза нейкіх складаных эканамічных перагавораў. У час праграмы адзначалася, што расійскія СМІ некалькі разоў карэкціравалі каментарый прэс-сакратара Прэзідэнта Беларусі Наталлі Эйсмант наконт рэакцыі расійскага прэм'ера на словы беларускага лідара.
Дырэктар прадстаўніцтва МТРК "Мір" у Беларусі Уладзімір Пярцоў нагадаў, што ў інтэрв'ю казахстанскаму агенцтву "Хабар" выразна прасочвалася логіка выказвання Прэзідэнта пра шматлікія войны, якія закранулі Беларусь. "Гэта сапраўды не намі былі развязаны войны. Беларускаму народу і Беларусі яны нанеслі самы сакрушальны ўрон", - сказаў Уладзімір Пярцоў. Ён падкрэсліў, што фраза Аляксандра Лукашэнкі была вырвана з кантэксту і стала прадметам непатрэбнай інтэрпрэтацыі, якую і агучыў расійскі прэм'ер.