24 кастрычніка, Мінск /Кар. БЕЛТА/. Прагноз па ўзроўні інфляцыі ў Нацыянальнага банка станоўчы: пікавыя значэнні пройдзены і далей інфляцыя будзе паступова запавольвацца. Такую думку выказаў журналістам старшыня праўлення Нацыянальнага банка Павел Калаур пасля даклада Прэзідэнту Беларусі Аляксандру Лукашэнку, перадае карэспандэнт БЕЛТА.
"Урад і мы прымаем меры для таго, каб інфляцыя зніжалася. Нашы прагнозы аптымістычныя. Мы чакаем, што прайшлі пік высокай інфляцыі і яна паступова будзе запавольвацца. Адпаведна будзе прадоўжаны працэс зніжэння ставак па крэдытах і ўсё гэта ў сукупнасці стварае нармальныя ўмовы для рэальнага сектара эканомікі па даступнасці крэдытаў", - сказаў кіраўнік Нацбанка.
Паводле яго слоў, сітуацыя ў эканоміцы патрабавала павелічэння працэнтных ставак па дэпазітах, каб "захоўваўся ашчадны працэс". І банкаўская сістэма гэта забяспечыла. "У беларускай нацыянальнай валюце захоўваецца дадатны ў параўнанні з інфляцыяй прырост. Ён невялікі, але ўстойлівы і дадатны, - адзначыў Павел Калаур. - Па замежнай валюце ёсць невялікае скарачэнне дэпазітаў. Прыкладна каля паўмільярда долараў. Але гэтыя рэсурсы банкаўскай сістэме і не патрэбны былі, паколькі прадпрыемствы зарабілі на знешнім рынку валютную выручку і скарачалі валютнае крэдытаванне".
Больш таго, склалася ўнікальная сітуацыя, калі па новавыдаваемых крэдытах стаўка бывае ніжэйшая, чым узровень інфляцыі: напрыклад, 14,06 працэнта гадавых па крэдыце, што ў рэальным выражэнні з улікам інфляцыі - мінус 2,75 працэнта.
"У гэтым годзе эканоміка працуе з дадатным плацежным балансам. Прадпрыемствы, краіна атрымалі за 9 месяцаў $2,1 млрд выручкі, якая прадпрыемствамі была выкарыстана часткова для пагашэння знешняй крэдыторскай запазычанасці, часткова - для пагашэння крэдытаў беларускіх банкаў у замежнай валюце. Таксама склалася нядрэнная рэнтабельнасць у рэальным сектары эканомікі - амаль Br12,5 млрд прыбытку на чыстай аснове. І гэта таксама дазволіла прадпрыемствам вырашаць свае праблемы самастойна. Такім чынам, мы маем такую пазітыўную сітуацыю, калі плацежаздольны попыт, асабліва ў беларускіх рублях, задавальняецца банкаўскай сістэмай. А крэдыты ў замежнай валюце скараціліся, што, вядома, вельмі пазітыўна", - сказаў кіраўнік Нацбанка.
"З пункту гледжання доступу да крэдытаў у плацежаздольных прадпрыемстваў пытанняў няма", - дадаў ён.-0-
