9 лютага, Мінск /Кар. БЕЛТА/. Дзяржкаммаёмасць плануе перавесці ўсе працэдуры ў сферы дзяржрэгістрацыі ў электронны фармат. Аб гэтым расказаў старшыня Дзяржкаммаёмасці Дзмітрый Матусевіч на пасяджэнні Генеральнай асамблеі Рэспубліканскай канфедэрацыі прадпрымальніцтва, перадае карэспандэнт БЕЛТА.
Дзмітрый Матусевіч адзначыў, што ў мінулым годзе значна змянілася зямельнае заканадаўства і яно прадаўжае фарміравацца. "Фактычна зямельны кодэкс пачаў працаваць з пачатку года. Так, мясцовыя органы ўлады яшчэ не поўнасцю прывыклі да новага заканадаўства, але бізнес-саюзы ў тым ліку могуць дапамагаць ім у гэтым", - сказаў ён.
Акрамя гэтага, у верасні мінулага года Прэзідэнт Беларусі Аляксандр Лукашэнка падпісаў указ нумар 330 "Аб распараджэнні маёмасцю". Дакумент прыняты ў мэтах удасканалення адносін па распараджэнні маёмасцю, пашырэння паўнамоцтваў рэспубліканскіх і мясцовых органаў дзяржаўнага кіравання, спрашчэння парадку ўключэння невыкарыстоўваемай маёмасці ў гаспадарчы абарот. "З 22 сакавіка ён уступіць у сілу. Гэта важны дакумент. Ёсць таксама новаўвядзенне - зацверджаны пашпарт закансерваванага аб'екта, гэта значыць спрошчаны парадак атрымання дакументаў, каб далей уласнік мог распарадзіцца аб'ектам. Гэта магчымасць для бізнесу купіць такі аб'ект", - расказаў Дзмітрый Матусевіч.
Старшыня Дзяржкаммаёмасці таксама адзначыў, што ўказ па арэндзе ўжо ўнесены і ўзгоднены з усімі зацікаўленымі. "Пасля экспертызы, спадзяюся, ён будзе прадстаўлены кіраўніку дзяржавы для дакладу. У ім утрымліваюцца льготныя каэфіцыенты для прамысловых аб'ектаў і шэраг іншых навел. Яны пасадзейнічаць развіццю малога бізнесу, попыт на арэндныя плошчы ёсць. Акрамя таго, з 2019 года мы не паднімаем базавую арэндную велічыню, і ў гэтым годзе такія рашэнні таксама прыняты. Гэта велічыня фактычна ўжо пяць гадоў нязменная і фактычна субсідуецца дзяржавай", - расказаў ён.
Ёсць і іншыя меры падтрымкі, напрыклад, лічбавыя прадукты і сэрвісы. "З апошняга - гэта рэестр старых і пустуючых дамоў, які пачаў працаваць з новага года. Цяпер мы робім яго візуалізацыю на публічнай кадастравай карце. Асноўная задача на 2023 год для бізнесу - перавесці ўсе працэдуры ў сферы дзяржрэгістрацыі ў электронны фармат", - рэзюмаваў Дзмітрый Матусевіч.-0-
