3 лютага, Мінск /Кар. БЕЛТА/. Каля 130 адстаючых сельгасарганізацый Віцебскай вобласці аб'яднаюць ва ўзбуйненыя структуры. Гэта прадугледжана праектам указа аб развіцці АПК Віцебскай вобласці, паведаміў міністр сельскай гаспадаркі і харчавання Анатоль Хацько 2 лютага ў эфіры праграмы "Галоўны эфір" на тэлеканале "Беларусь 1", паведамляе БЕЛТА.
"Праект указа комплексны па напаўненні. Ён закранае і сельгасвытворчасць, і перапрацоўку. Праектам указа ствараюцца аграпрамысловыя аб'яднанні. Сутнасць у тым, каб сфарміраваць узаемаадносіны паміж перапрацоўкай і вытворцамі. Другая частка пытання - даць фінансавае аздараўленне гэтым аб'яднанням. Пры разглядзе ў Прэзідэнта была акцэнтавана ўвага, каб фінансавае аздараўленне ў далейшым дало магчымасць для вытворчага, эканамічнага росту", - расказаў Анатоль Хацько.
У аб'яднаныя структуры - усяго іх будзе 7 - увойдуць каля 130 сельгаспрадпрыемстваў. Усяго ў Віцебскай вобласці 240 гаспадарак, з іх больш за 40 будуць працаваць самастойна. Фінансавае аздараўленне згодна з указам нумар 399 ад 2 кастрычнiка 2018 года праходзяць каля 30 гаспадарак. Ёсць спіс з амаль 20 сельгасарганізацый, куды мог бы прыйсці інвестар.
Адказваючы на пытанне аб кадрах, Анатоль Хацько сказаў, што ў вёсцы сёння не хапае каля 5 тыс. галоўных спецыялістаў і спецыялістаў сярэдняга звяна, у тым ліку ў Віцебскай вобласці - каля 600 чалавек. "Але гэта не крытычна, безумоўна. Мы павінны разумець, што прадукцыйнасць працы спецыяліста павінна павышацца, г.зн. трэба карэкціраваць нагрузку, і яна павінна быць ацэнена матэрыяльна", - лічыць міністр. На яго думку, асноўную ролю ў замацаванні кадраў адыгрываюць кіраўнікі гаспадарак, для маладых людзей важны ўмовы працы, забяспечанасць жыллём, матывацыя.-0-
