ДЗЯРЖОРГАНЫДЗЯРЖОРГАНЫ
Флаг Нядзеля, 19 верасня 2021
Мінск Пераменная воблачнасць +6°C
Усе навіны
Усе навіны
Культура
12 красавіка 2021, 13:04

Кнігі знакамітай бібліятэкі Храптовічаў і ўнікальную перапіску XIX стагоддзя пакажуць у НББ

Фота з архіва
Фота з архіва

12 красавіка, Мінск /Кар. БЕЛТА/. Выстава "Кнігазбор Храптовічаў: на шляху вяртання" адкрыецца 15 красавіка ў Нацыянальнай бібліятэцы Беларусі, паведамілі БЕЛТА ва ўстанове.

"У Музеі кнігі НББ упершыню будуць прадстаўлены ўнікальныя экспанаты: перапіска XIX стагоддзя сям'і Храптовічаў і вернутыя з-за мяжы кнігі з іх знакамітай бібліятэкі ў Шчорсах", - адзначылі арганізатары.

Тры кнігі і перапіска прадстаўнікоў роду Храптовічаў былі вернуты ў Беларусь з Германіі ў лютым 2020 года і з таго часу захоўваліся ў Нацыянальнай бібліятэцы. "Вяртанне адбывалася намаганнямі дабрачыннага фонду "Шчорсы і Храптовічы". Некалі бібліятэка, якую пачынаў збіраць канцлер Іаахім Літавор Храптовіч у XVIII стагоддзі, лічылася адной з самых багатых ва Усходняй Еўропе", - падкрэслілі ў НББ.

"Як старадаўнія кнігі, так і перапіска на французскай мове з'яўляюцца надзвычай каштоўнымі помнікамі свайго часу, якія дагэтуль нідзе не публікаваліся і не дэманстраваліся публіцы. У мінулым годзе са згоды апошніх уладальнікаў знойдзеныя каштоўныя дакументы былі перададзены ў Беларусь", - расказалі арганізатары.

Падчас адкрыцця выставы адбудзецца афіцыйная перадача кніг і перапіскі Храптовічаў на захоўванне ў Нацыянальную бібліятэку.

Акрамя таго, прадстаўнікі НББ і дабрачыннага фонду раскажуць пра першы вопыт даследавання кніг і перапіскі Храптовічаў, звернуць увагу на іх значэнне для беларускай і сусветнай культуры, а таксама раскажуць пра новыя крокі ў вывучэнні гісторыі знакамітага роду, яго спадчыны ў Беларусі і за мяжой.

Таксама ў экспазіцыі будуць прадстаўлены мастацкія творы студэнтаў БНТУ, якія працавалі валанцёрамі ў летніх лагерах па добраўпарадкаванні маёнтка Храптовічаў у Шчорсах у 2018-2019 гадах.

Выстава будзе адкрыта да 30 красавіка.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі