1 снежня, Мінск /Кар. БЕЛТА/. Апошнія паведамленні аб вакцынах ад каранавіруснай інфекцыі пазітыўныя, аднак у эканоміцы ЗША захоўваецца нявызначанасць з-за пытанняў адносна тэрмінаў распаўсюджвання прэпаратаў. Аб гэтым заявіў старшыня Федэральнай рэзервовай сістэмы (ФРС), якая выконвае функцыі цэнтральнага банка краіны, Джэрам Паўэл, паведамляе ТАСС.
"Эканамічная актыўнасць у ЗША аднаўлялася пасля дэпрэсіўнага ўзроўню ў другім квартале. Адкрыццё эканомікі прывяло да хуткага аднаўлення актыўнасці, рэальны ВУП вырас на 33 працэнты ў трэцім квартале, - сказаў Джэрам Паўэл. - Аднак у апошнія месяцы тэмпы запаволіліся". Паводле даных ФРС, расходы грамадзян на тавары, асабліва працяглага выкарыстання, нават перавысілі дакрызісны ўзровень, у той час як траты ў сферы паслуг застаюцца нізкімі з-за дзеючых абмежаванняў на збіранне вялікай колькасці людзей.
Разам з тым павелічэнне расходаў насельніцтва звязана таксама са стымулюючымі выплатамі і пашыранымі дапамогамі па беспрацоўі, адзначыў старшыня ФРС. "Перспектывы для эканомікі вельмі нявызначаныя і будуць залежаць у большай частцы ад поспеху намаганняў па стрымліванні віруса, - лічыць ён. - Поўнае аднаўленне малаверагодна да таго часу, пакуль людзі не будуць упэўнены ў бяспецы вяртання да шырокага спектра дзейнасці".
"Апошнія навіны аб вакцыне вельмі пазітыўныя ў сярэднетэрміновай перспектыве. Цяпер захоўваюцца значныя выклікі і нявызначанасці, уключаючы час, вытворчасць і размеркаванне, эфектыўнасць вакцыны сярод розных груп, - звярнуў увагу Джэрам Паўэл. - Усё яшчэ складана ацаніць тэрміны і маштабы эканамічных наступстваў гэтых падзей".
Успышка выкліканага каранавіруснай інфекцыяй захворвання была зафіксавана ў канцы 2019 года ў Цэнтральным Кітаі і распаўсюдзілася на большасць краін. 11 сакавіка Сусветная арганізацыя аховы здароўя прызнала яе пандэміяй. Усе краіны і тэрыторыі былі вымушаны прыняць розныя экстранныя меры санітарна-эпідэміялагічнага характару, што прывяло да ўзнікнення глыбокага міжнароднага эканамічнага крызісу. Паводле прагнозу Міжнароднага валютнага фонду, у бягучым годзе ў сусветнай эканоміцы будзе зафіксаваны спад у памеры амаль 5 працэнтаў, але яна адновіцца і вырасце на 5,4 працэнта ў 2021 годзе.-0-
