15 мая, Мінск /Кар. БЕЛТА/. 136-я сесія Міжнароднага алімпійскага камітэта (МАК) пройдзе ў віртуальным рэжыме з-за абмежаванняў, выкліканых пандэміяй каранавіруса. Аб гэтым паведамілі карэспандэнту БЕЛТА ў прэс-службе Нацыянальнага алімпійскага камітэта.
Пастанову аб такім фармаце выканкам МАК прыняў 14 мая. Плануецца, што 136-я сесія адбудзецца 17 ліпеня. Работа будзе арганізавана дыстанцыйна праз бяспечную электронную сістэму і трансліравацца ў прамым эфіры.
Выканкам МАК таксама зацвердзіў змяненне тэрмінаў выбараў у камісію спартсменаў гэтай арганізацыі, адклаўшы іх да ліпеня 2021 года. Тэрміны паўнамоцтваў чатырох выбраных і аднаго назначанага членаў камісіі атлетаў МАК завяршаюцца ў бягучым годзе.
У агульнай колькасці 30 спартсменаў будуць змагацца за чатыры вакантныя месцы ў камісіі спартсменаў МАК.
Выбары старшыні камісіі атлетаў МАК і яго намесніка былі запланаваны на жнівень 2020 года ў Токіа. Старшыня камісіі аўтаматычна становіцца членам Выканаўчага камітэта МАК.-0-