17 верасня, Мінск /Кар. БЕЛТА/. Футбалісткі жаночай зборнай Беларусі паспяхова стартавалі ў адборачным турніры чэмпіянату свету 2023 года, паведамляе карэспандэнт БЕЛТА.
У матчы першага тура кваліфікацыйнай групы С беларускі з лікам 4:1 разграмілі на полі мінскага стадыёна "Дынама" дэбютантак адборачнага турніру сусветнага першынства кіпрскіх футбалістак.
Таксама сёння адзін з фаварытаў гэтай групы віцэ-чэмпіён планеты зборная Нідэрландаў прыме ў Гронінгене каманду Чэхіі. У групе С таксама згуляе зборная Ісландыі.
Пераможцы дзевяці еўрапейскіх адборачных груп атрымаюць прамыя пропускі ў фінальную стадыю 9-га жаночага чэмпіянату свету. Каманды, якія фінішуюць другімі, у матчах плэй-оф разыграюць яшчэ дзве пуцёўкі ў Аўстралію і Новую Зеландыю, што летам 2023 года стануць гаспадарамі планетарнага форуму, у якім упершыню прымуць удзел 32 каманды. У фінале ЧС-2019 у Францыі зборная ЗША заваявала сваё чацвёртае золата, абыграўшы нідэрландскіх футбалістак з рэзультатам 2:0. Уладальніцамі бронзавых узнагарод сталі шведкі, якія перамаглі ў матчы за 3-е месца англічанак з лікам 2:1.-0-
