Баскетбалісткі "Гарызонта" выйгралі сёмы матч запар у чэмпіянаце Беларусі

18 снежня, Мінск /Кар. БЕЛТА/. Фаварыты жаночага чэмпіянату Беларусі па баскетболе атрымалі перамогі ў матчах чарговага тура, паведамляе карэспандэнт БЕЛТА.

Лідары турніру баскетбалісткі "Гарызонта" выйгралі сёмы паядынак запар, разграміўшы маладзёжную каманду БК "МІНСК" з лікам 74:48. З 15 праведзеных сустрэч падапечныя Наталлі Трафімавай выйгралі 14, пацярпеўшы адзінае паражэнне ад галоўнай дружыны "МІНСКА", якая сёння без праблем абыграла "Гарызонт-2-РЦАП" - 76:42. Становішча ў лідзіруючай групе цяпер такое: "Гарызонт" - 29 ачкоў (15 матчаў), "МІНСК" - 27 (15), "Алімпія" (Гродна) - 25 (15).

Турнірную табліцу мужчынскага першынства ўзначальваюць баскетбалісты магілёўскага "Барысфена", якія напярэдадні перамаглі ў гасцях дзеючых чэмпіёнаў краіны баскетбалістаў "МІНСКА" з лікам 79:66. Віцебскі "Рубон" з лікам 108:45 абыграў у сябе дома сталічны клуб "Імпульс-БДУІР", для якога гэта 15-е паражэнне ў 15 праведзеных сустрэчах.

Становішча ў групе лідараў цяпер такое: "Барысфен" - 26 ачкоў (15 матчаў), "Гродна-93" - 25 (15), "Мінск" - 24 (15), "Рубон" - 24 (16). У наступным туры 21 снежня "МІНСК" на сваёй пляцоўцы будзе сапернічаць з "Гродна-93", а "Барысфен" у сябе дома прыме "Імпульс-БДУІР".-0-