18 лістапада, Масква /Эдуард Півавар - БЕЛТА/. Пытанні сумеснай дзейнасці па выяўленні і падтрымцы адораных дзяцей і моладзі Беларусі і Расіі будуць разгледжаны на пасяджэнні камісіі Парламенцкага сходу Саюза Беларусі і Расіі па маладзёжнай палітыцы, спорце і турызме. Яно пройдзе 24 лістапада ў Мінску на тэрыторыі Нацыянальнага дзіцячага тэхнапарка Рэспублікі Беларусь, паведамілі БЕЛТА ў прэс-службе сходу.
Дэпутаты Парламенцкага сходу азнаёмяцца з дзейнасцю Нацыянальнага дзіцячага тэхнапарка, сустрэнуцца з кіраўніцтвам адукацыйнай установы і абмяркуюць перспектыўныя напрамкі супрацоўніцтва з расійскімі адукацыйнымі арганізацыямі, у тым ліку ў рамках праграм і мерапрыемстваў Саюзнай дзяржавы.
"Падчас пасяджэння камісіі дэпутаты разгледзяць перспектыўныя напрамкі ўзаемадзеяння Парламенцкага сходу з адукацыйным цэнтрам "Сірыус". Плануецца абмеркаванне пытанняў арганізацыі візіту дэлегацыі федэральнай тэрыторыі "Сірыус" у Беларусь, удзелу адораных дзяцей і моладзі Беларусі і Расіі ў праграмах адукацыйнага цэнтра "Сірыус", правядзення сумесных стажыровак для педагогаў і студэнтаў. Акрамя таго, плануецца разгледзець пытанні па падрыхтоўцы і правядзенні сумесных маладзёжных мерапрыемстваў у сферах адукацыі, спорту, культуры і мастацтва", - расказалі ў прэс-службе.
Раней дэпутаты - члены Камісіі Парламенцкага сходу па маладзёжнай палітыцы, спорце і турызме сустрэліся з кіраўніцтвам федэральнай тэрыторыі "Сірыус". Вызначаны перспектывы ўдзелу адукацыйнага цэнтра "Сірыус" у мерапрыемствах Саюзнай дзяржавы.-0-
