17 верасня, Мінск /Кар. БЕЛТА/. Нельга разбураць створанае былымі пакаленнямі, але трэба гэта выкарыстоўваць, развіваць, мадэрнізаваць. Аб гэтым Прэзідэнт Беларусі Аляксандр Лукашэнка заявіў на сустрэчы з ідэалагічным актывам, гістарычнай і экспертнай супольнасцю, прысвечанай Дню народнага адзінства, перадае карэспандэнт БЕЛТА.
"Калі я гавару, што я савецкі чалавек, гэта не значыць, што я прымаю ўсё тое, што было", - адзначыў кіраўнік дзяржавы.
Паводле яго слоў, ён тым самым падкрэслівае, што не адмаўляецца ад мінулага, у тым ліку свайго. "Я як савецкі чалавек стараюся ўзяць усё лепшае адтуль. А шмат добрага было. Мы сталі нараўне з сусветнай імперыяй. І ніводнае пытанне без нас не вырашалася. Часам улазілі туды, куды не трэба было ўлазіць", - сказаў Аляксандр Лукашэнка. Адзін з прыкладаў - вайна ў Аўганістане. "Можа, якія-небудзь іншыя варыянты былі магчымыя. Але мы ж кашулю рванулі... І наперад. Ну, схадзілі туды. Праз дзесяць гадоў вярнуліся. Што атрымалі? Нічога. Амерыканцы туды схадзілі, таксама вярнуліся, нічога не атрымалі", - заўважыў Прэзідэнт.
Кіраўнік дзяржавы ўпэўнены, што савецкі вопыт можа быць часткова прымяняльны і ў плане эканомікі. Тым больш што Беларусь у часы Савецкага Саюза мела добра развітую прамысловасць, сельскую гаспадарку, будаўніцтва, іншыя галіны народнай гаспадаркі. "І, стаўшы Прэзідэнтам, я зарубіў сабе на носе, што нельга разбураць тое, што стварылі да нас. Трэба гэта выкарыстоўваць, развіваць, мадэрнізаваць, - заявіў ён. - Як савецкі чалавек я перш за ўсё спрабаваў захаваць тое, што было створана неймавернымі намаганнямі, неймавернай працай нашага народа".
Што датычыцца палітычнай сістэмы краіны, з савецкіх часоў захавалася Камуністычная партыя, лідар якой прысутнічаў на мерапрыемстве. Аляксандр Лукашэнка сказаў, што з павагай ставіцца да сучасных камуністаў, якія захоўваюць пераемнасць, абапіраюцца на сваю гісторыю, мінулае. Акрамя партыі, з былых часоў захаваўся і маладзёжны рух, заснаваны на вопыце савецкага камсамола, але мадэрнізаваны, адаптаваны да сучасных рэалій. Аляксандр Лукашэнка заўважыў, што цяпер у гэтым руху шмат арганізацый, яны разгрупаваны. Але штучна стрымліваць іх нельга, трэба акуратна прыйсці да таго, каб сфарміравалася магутная маладзёжная арганізацыя. "Адкідваць нічога не трэба. Але варта вызначыць асноўныя лініі, напрамкі", - лічыць Прэзідэнт. Напрыклад, будатрадаўскі рух, валанцёрства.
"Мы бралі лепшае з савецкага мінулага. Упэўнены (я па выбарах памятаю), што вы падтрымлівалі і падтрымліваеце такую практыку і палітыку", - рэзюмаваў кіраўнік дзяржавы.-0-
Падпісвайцеся на нас у
