Павышэнне пенсійнага ўзросту дасць магчымасць сэканоміць фінансы, заявіў 11 сакавіка журналістам першы намеснік старшыні Брэсцкага аблвыканкама Мікалай Токар, перадае карэспандэнт БЕЛТА.
"Лічу, што гэта дасць эканомію фінансавых сродкаў у цэлым па краіне", - сказаў Мікалай Токар.
Першы намеснік старшыні аблвыканкама падкрэсліў, што многія людзі пенсійнага ўзросту хочуць працаваць. У тым ліку гэта датычыцца бюджэтнай сферы. "Сёння здаровыя мужчыны, напрыклад, у 60 гадоў хочуць яшчэ працаваць. Трэба даць ім магчымасць працаваць афіцыйна. У іх ёсць вопыт. І потым 60 гадоў - гэта яшчэ даволі энергічны ўзрост... Чаму педагог-жанчына ў 57 гадоў не можа працаваць? Яны ж хочуць. Чаму ж мы павінны думаць, як іх сёння адправіць на пенсію? У нас у вобласці працуе шмат пенсіянераў і ў сельгасвытворчасці, на прамысловых прадпрыемствах", - дадаў ён.
Таксама, паводле яго слоў, з-за павышэння ўзроставага парога для пенсіянераў не трэба чакаць сур'ёзных змяненняў. "Пенсійны ўзрост будзе павышацца паэтапна", - растлумачыў Мікалай Токар.
Як паведамлялася, 10 сакавіка Прэзідэнту Беларусі Аляксандру Лукашэнку на нарадзе па пытаннях развіцця пенсійнай сістэмы былі прапанаваны тры варыянты павышэння пенсійнага ўзросту. Усе яны эканамічна падлічаны, у тым ліку з прыцягненнем вучоных. Першы варыянт прадугледжвае выхад на пенсію жанчын у 60 гадоў і мужчын у 65. Другі: жанчын у 60 гадоў, мужчын у 63 гады. Трэці варыянт прадугледжвае ўвядзенне пенсійнага ўзросту з 58 гадоў для жанчын і з 63 гадоў - для мужчын.
