У гэтым годзе Беларусь і Расія 25-ы раз адзначаць Дзень яднання народаў Беларусі і Расіі. У 1996 годзе быў падпісаны Дагавор аб стварэнні Супольніцтва Беларусі і Расіі, якое 2 красавіка 1997 года пераўтворана ў Саюз Беларусі і Расіі. Сёння гэта аб'яднанне - прыклад паспяховай інтэграцыі незалежных дзяржаў. Істотны ўклад у саюзнае будаўніцтва ўнеслі парламентарыі дзвюх краін, намаганнямі якіх быў створаны агульны Парламенцкі сход, які з'яўляецца прадстаўнічым і заканадаўчым органам Саюзнай дзяржавы. Аб неабходнасці стварэння Саюзнай дзяржавы і дасягнутых выніках БЕЛТА расказаў старшыня Палаты прадстаўнікоў Нацыянальнага сходу Рэспублікі Беларусь Уладзімір Андрэйчанка.
- Чым абгрунтавана неабходнасць стварэння Саюзнай дзяржавы?
- Мы роднасныя славянскія народы, аб'яднаныя адзінай верай і маральнымі каштоўнасцямі, нашы лёсы пераплецены і спаяны агульнай гісторыяй. Расія і Беларусь маюць эканомікі, якія дапаўняюць адна адну. Стварэнне Саюзнай дзяржавы - вынік палітычнага працэсу па пошуку балансу паміж нацыянальнымі інтарэсамі дзяржаў і аб'яднанні намаганняў для далейшага развіцця і пераадолення сучасных выклікаў і пагроз у розных сферах жыццядзейнасці ў мэтах павышэння якасці жыцця нашых народаў.
- Уладзімір Паўлавіч, якія вынікі дасягнуты краінамі за мінулыя гады?
- У якасці асноўных задач інтэграцыі былі вызначаны ўзгадненне знешняй палітыкі, пытанняў абароны і бяспекі, стварэнне адзінай эканамічнай прасторы, забеспячэнне захавання правоў грамадзян і іншыя пытанні. Дзесяцігоддзі карпатлівай працы далі магчымасць рэалізаваць пастаўленыя мэты, стварыць базу для інтэграцыі заканадаўстваў у палітычнай, прававой, эканамічнай, сацыяльнай, экалагічнай, гуманітарнай і іншых сферах. Са снежня 1998 года грамадзяне Беларусі і Расіі карыстаюцца роўнымі правамі, а для суб'ектаў гаспадарання дзяржаў-саюзнікаў паступальна ствараюцца роўныя ўмовы. Даволі эфектыўна функцыянуе Парламенцкі сход Саюза Беларусі і Расіі, які планава пашырае спектр задач, што вырашаюцца.
4 лістапада 2021 года прыняты Ваенная дактрына і Канцэпцыя міграцыйнай палітыкі Саюзнай дзяржавы, Дэкрэт Вышэйшага дзяржаўнага савета Саюзнай дзяржавы нумар 6 "Аб асноўных напрамках рэалізацыі палажэнняў Дагавора аб стварэнні Саюзнай дзяржавы на 2021-2023 гады", які з'яўляецца, па сутнасці, рэальным планам саюзнага будаўніцтва на бліжэйшую перспектыву.
- У чым асаблівасці рэалізацыі палажэнняў гэтага дакумента?
- Ён ахоплівае практычна ўсе сферы функцыянавання Саюзнай дзяржавы, вызначае сілы, сродкі і канкрэтныя тэрміны рэалізацыі 28 праграм (дарожных карт), якія дадуць магчымасць да 2024 года сфарміраваць адзіную прававую і эканамічную прастору ад Брэста да Уладзівастока. Шэраг задач, сярод якіх інтэграцыя інфармацыйных сістэм і падаткаабкладання, уніфікацыя транспартнага рынку і мытнага ўзаемадзеяння, выпрацоўка адзіных правіл канкурэнцыі і гандлю, плануецца рэалізаваць у бягучым годзе. Гэта патрабуе актыўнай работы і цеснага супрацоўніцтва ўсіх галін улады, высокай якасці і ўсебаковай прапрацоўкі праектаў заканадаўчых актаў, аператыўнага іх разгляду ў профільных парламенцкіх камісіях Беларусі і Расіі. Упэўнены, што разам мы дасягнём пастаўленых мэт.
- Ці ёсць нейкія цяжкасці на гэтым шляху?
- Вырашэнне задач міждзяржаўнага ўзроўню заўсёды звязана з істотнымі складанасцямі. Адным з найважнейшых фактараў, што ўскладняюць рэалізацыю саюзных праектаў, з'яўляецца фарміраванне шматпалярнага светаўладкавання і імкненне ЗША і аб'яднанага Захаду захаваць уласнае дамінаванне. Палітычныя, фінансавыя, эканамічныя санкцыі супраць Расіі і Беларусі ствараюць пэўныя праблемы, але адначасова даюць новы імпульс інтэграцыі ў рамках Саюзнай дзяржавы. Ужо сёння мы поўнасцю аўтаномныя ў галіне ваеннай бяспекі, забяспечаны прадуктамі харчавання, энерганосьбітамі, прадукцыяй лёгкай і цяжкай прамысловасці, самадастатковыя ў большасці сфер.
Мы прадаўжаем дынамічна развівацца, паказваючы ўсім краінам, што інтэграцыйныя працэсы - важная частка сучаснага светаўладкавання. Шлях аб'яднання, які рэалізуецца Расіяй і Беларуссю чвэрць стагоддзя, абумоўлены гістарычным выбарам нашых народаў.
Нашы краіны прайшлі вялікую частку шляху да Саюзнай дзяржавы, дэманструючы адзінства пазіцый і гатоўнасць пераадольваць усе магчымыя цяжкасці.-0-
