12 студзеня, Мінск /Кар. БЕЛТА/. Міністр прамысловасці Аляксандр Рагожнік наведаў ЗАТ "Атлант", дзе азнаёміўся з праектам беражлівай вытворчасці. Аб гэтым паведамілі карэспандэнту БЕЛТА ў прэс-службе Мінпрама.
Кіраўнік ведамства пабываў на вытворчых участках цэха апрацоўкі металаў і цэха зборкі халадзільнікаў. Аб арганізацыі работы прадпрыемства і працэсе вырабу халадзільнікаў расказаў генеральны дырэктар ЗАТ "Атлант" Дзмітрый Сакалоўскі. Міністру расказалі аб праекце беражлівай вытворчасці, які цяпер рэалізуецца на Мінскім заводзе халадзільнікаў на ўчастку зборкі і цеплаізаляцыі шафы. Пасля яго заканчэння будзе дасягнута максімальная прадукцыйнасць за кошт найбольш раўнамернай загрузкі рабочых месцаў на зборачным канвееры.
Адносна перспектыў развіцця "Атланта" гендырэктар паведаміў, што кампанія працуе над маштабным інвестыцыйным праектам па вытворчасці маразільных скрынь. Гэта імпартазамяшчальная прадукцыя, якая не выпускаецца ў Беларусі і адкрые новы сегмент рынку халадзільнай тэхнікі. Пляцоўкай для новай вытворчасці стане 8-ы корпус прадпрыемства. Цяпер там ідуць падрыхтоўчыя будаўнічыя работы.
У час наведвання размова таксама ішла аб мэтах Года якасці і задачах, якія стаяць перад калектывам ЗАТ "Атлант".-0-
