2 сакавіка, Мінск /Кар. БЕЛТА/. Польшча запрасіла Беларусь прыняць удзел у міжнародным кніжным кірмашы, які пройдзе ў Варшаве 18-21 мая. Афіцыйнае запрашэнне ад арганізатараў перадаў сёння міністру інфармацыі Ліліі Ананіч Надзвычайны і Паўнамоцны Пасол Польшчы ў Беларусі Конрад Паўлік, перадае карэспандэнт БЕЛТА.
Варшаўская кніжная выстаўка - самая буйная ў Польшчы. Конрад Паўлік выказаў упэўненасць, што беларускі стэнд зойме на ёй важнае месца. "Упэўнены, што ўдзел Беларусі будзе вельмі паспяховым, важным і знакавым, у тым ліку і ў сувязі з тым, што ў гэтым годзе адзначаецца 500-годдзе беларускага кнігадрукавання", - сказаў пасол.
Паводле яго слоў, Польшча задаволена сваім удзелам у XXIV Мінскай міжнароднай кніжнай выстаўцы-кірмашы ў лютым. Гэты форум стаў важным мерапрыемствам для польскіх выдаўцоў і аўтараў, меў добры рэзананс у краіне. Польшча прэзентавала на выстаўцы больш за 200 выданняў, якія выклікалі вялікі інтарэс у гасцей кірмашу.
Лілія Ананіч у сваю чаргу пераканана, што ўдзел Беларусі ў варшаўскай кніжнай выстаўцы стане добрым знакам у развіцці двухбаковых адносін. Бакі выказалі зацікаўленасць у тым, каб спланаваць насычаную праграму.
Сустрэча ў Міністэрстве інфармацыі адбылася па ініцыятыве польскага боку. 2 сакавіка адзначаецца 25-годдзе ўстанаўлення дыпламатычных адносін Беларусі і Польшчы, што надае асаблівую значнасць гэтай сустрэчы, адзначыў пасол.
Лілія Ананіч і Конрад Паўлік абмеркавалі таксама пытанні інфармацыйнага забеспячэння беларуска-польскага супрацоўніцтва. Адзначалася, што інфармацыя пра Беларусь запатрабавана ў Польшчы, у значнай часткі польскай аўдыторыі ёсць магчымасць глядзець тэлеканал "Беларусь 24". Польшча ў сваю чаргу хацела б, каб у Беларусі трансліраваліся польскія тэлеканалы, у прыватнасці тэлеканал "Культура". Абмяркоўваючы гэты момант, удзельнікі сустрэчы выказалі зацікаўленасць ва ўстанаўленні супрацоўніцтва паміж тэлекампаніямі.
Беларускі бок прапанаваў Польшчы разгледзець магчымасць заключэння міжурадавага пагаднення аб супрацоўніцтве ў галіне друку і інфармацыі. Гэта стала б добрым сігналам для медыйнай сферы, адзначыла міністр. Лілія Ананіч таксама звярнула ўвагу, што Беларусь і ў медыйнай сферы прытрымліваецца прынцыпаў добрасуседства, не дапускаючы распаўсюджвання дэструктыўнай інфармацыі ў адносінах да іншых краін. Такая палітыка прызначана садзейнічаць развіццю канструктыўных міждзяржаўных адносін, у тым ліку і з Польшчай.-0-
