3 сакавіка, Мінск /Кар. БЕЛТА/. Прэзідэнт Расіі Уладзімір Пуцін запатрабаваў у адпаведнасці з законам рэагаваць на спробы ўцягнуць непаўналетніх у незаконныя вулічныя акцыі, паведамляе ТАСС.
"Тое, што непаўналетніх уцягваюць і ў незаконныя, несанкцыянаваныя вулічныя акцыі, - гэта, вядома, парушэнне закону. У адпаведнасці з законам на гэта трэба рэагаваць, абавязкова", - адзначыў Уладзімір Пуцін, адкрываючы штогадовае пашыранае пасяджэнне калегіі МУС Расіі.
Прэзідэнт РФ адзначыў усё большую эфектыўнасць прафілактыкі правапарушэнняў, у першую чаргу ў маладзёжным асяроддзі. Паводле слоў Уладзіміра Пуціна, пазітыўныя тэндэнцыі па гэтым напрамку работы ёсць, але МУС неабходна і ў далейшым разам з калегамі з іншых ведамстваў весці маніторынг інтэрнэт-прасторы, актыўней выяўляць у сетцы тых, хто ўцягвае непаўналетніх у проціпраўныя дзеянні.
Таксама на пасяджэнні Прэзідэнтам Расіі была адзначана актыўная прапрацоўка мер па абароне супрацоўнікаў праваахоўных органаў і іх блізкіх ад пагроз. "Актыўна прапрацоўваецца законапраект, накіраваны на абарону супрацоўнікаў праваахоўных органаў і іх блізкіх ад любых пагроз, у тым ліку ў сацсетках. Дзяржава выканае свой абавязак: бяспека людзей, якія стаяць на варце закону і правапарадку, а таксама членаў іх сем'яў, будзе забяспечана", - сказаў Уладзімір Пуцін.-0-
