3 жніўня, Мінск /Кар. БЕЛТА/. Міжнародны валютны фонд (МВФ) выдзеліць $650 млрд на падтрымку сусветнай эканомікі, якая пацярпела ад наступстваў пандэміі, паведамляе Deutsche Welle.
Рашэнне стане "прышчэпкай для сусветнай эканомікі ў час беспрэцэдэнтнага крызісу", заявіла дырэктар-распарадчык установы Крысталіна Георгіева.
Аб'ём сродкаў для гэтай мэты з'яўляецца буйнейшым у гісторыі МВФ. Яны будуць пераведзены дзяржавам - удзельніцам фонду прапарцыянальна квотам. Рашэнне ўступіць у сілу 23 жніўня.
З агульнай сумы $275 млрд будзе накіравана на рынкі, якія развіваюцца. Кіраўнік фонду асабліва выдзеліла важнасць падтрымкі больш слабаабароненых краін - членаў МВФ у аднаўленні ад наступстваў пандэміі COVID-19 і дасягненні ўстойлівага доўгатэрміновага росту.-0-
