11 лютага, Мінск /Кар. БЕЛТА/. Прыярытэты наступнага пяцігоддзя канкрэтна абазначаны і маюць ярка выяўленую сацыяльную накіраванасць, але рэалізаваць іх можна толькі ва ўмовах міру і з'яднанасці беларускага народа. Аб гэтым заявіла карэспандэнту БЕЛТА дэлегат VI Усебеларускага народнага сходу, кіраўнік прадстаўніцтва Пастаяннага камітэта Саюзнай дзяржавы ў Мінску, член праўлення Беларускага саюза жанчын Мар'яна Шчоткіна.
"На VI Усебеларускім народным сходзе разгледзяць асноўныя палажэнні праекта праграмы сацыяльна-эканамічнага развіцця Рэспублікі Беларусь на 2021-2025 гады. Перад сходам гэтыя палажэнні былі абмеркаваны на гарадскім сходзе дэлегатаў ад Мінска, а таксама на дыялогавых пляцоўках, - адзначыла Мар'яна Шчоткіна. - На сходзе павінны быць вызначаны асноўныя вектары развіцця дзяржавы, пры гэтым у абмеркаванні ўдзельнічаюць прадстаўнікі працоўных калектываў, грамадскіх аб'яднанняў, дзяржаўных органаў".
Яна пераканана, што ў існуючых умовах асаблівую ўвагу варта ўдзяляць інтэграцыйным працэсам у Саюзнай дзяржаве. "Больш актыўны рух насустрач адзін аднаму, вырашэнне праблемных пытанняў забяспечыць развіццё нацыянальных эканомік, створыць умовы для росту дабрабыту людзей і, галоўнае, забяспечыць нацыянальную бяспеку. Братэрскія адносіны народаў Беларусі і Расіі - аснова супрацоўніцтва і паспяховага будаўніцтва Саюзнай дзяржавы", - падкрэсліла кіраўнік прадстаўніцтва Пастаяннага камітэта Саюзнай дзяржавы ў Мінску.
На яе думку, вельмі важна маладзёжная палітыка. "Беларусь і Расія аб'яднаны агульнай культурай, гісторыяй. Мы выхаваны пакаленнямі, якія перамаглі ў Вялікай Айчыннай вайне і аднавілі разбураныя тэрыторыі і вытворчасці. Але час ідзе, мяняюцца пакаленні, і трансфармацыя сістэмы каштоўнасцей - гэта рэальнасць. Таму ў рамках дзяржавы павінна быць выбудавана цэласная сістэма патрыятычнага выхавання. Ва ўсе часы шанавалі патрыётаў і пагарджалі здраднікамі, - прадоўжыла Мар'яна Шчоткіна. - І, выбудоўваючы агульную адукацыйную прастору ў Саюзнай дзяржаве, мэтазгодна выпрацаваць агульныя падыходы ў выхаваўчай рабоце, фарміраваць сістэму агульначалавечых каштоўнасцей, процідзейнічаць распаўсюджванню ідэй радыкалізму і нацыяналізму".
"Лакаматыў развіцця грамадства - моладзь, адукаваная, крэатыўная, патрыятычная, высокаінтэлектуальная, здаровыя амбіцыі якой накіраваны на самарэалізацыю, пабудову адкрытага справядлівага грамадства, заснаванага на салідарнасці пакаленняў і адзінстве, - адзначыла Мар'яна Шчоткіна. - Падтрымка дэлегатамі УНС стратэгічных напрамкаў развіцця краіны і грамадства сфарміруе фундамент для сістэмных дзеянняў па іх рэалізацыі".-0-
