5 студзеня, Мінск /Кар. БЕЛТА/. На VII Пленуме Цэнтральнага камітэта Беларускага рэспубліканскага саюза моладзі выбраны 140 удзельнікаў VI Усебеларускага народнага сходу, паведаміў карэспандэнту БЕЛТА першы сакратар Цэнтральнага камітэта БРСМ Дзмітрый Варанюк.
"На пленуме, што адбыўся сёння ў Рэспубліканскім доме моладзі, удзельнікамі Усебеларускага народнага сходу выбраны лепшыя прадстаўнікі нашай арганізацыі, якія ў складзе маладзёжнай каманды будуць прадстаўляць на форуме народнай дыпламатыі інтарэсы маладых беларусаў. Мы адкрыта абмяркоўвалі кожную кандыдатуру і выбралі самых дастойных хлопцаў і дзяўчат, якія прадстаўляюць абсалютна розныя сферы, а некаторыя з іх былі ўдастоены дзяржаўных узнагарод. Пры гэтым мы стараліся захаваць гендарны баланс: 48,2 працэнта - дзяўчаты, 51,8 - хлопцы", - расказаў Дзмітрый Варанюк.
Сярод прадстаўнікоў маладзёжнай арганізацыі ўдзельнікамі УНС выбраны студэнты, маладыя кіраўнікі прадпрыемстваў, інжынеры, рабочыя, ваеннаслужачыя, педагогі, спартсмены, прадстаўнікі маладзёжных грамадскіх інстытутаў. "Усяго БРСМ выбраны 140 удзельнікаў Усебеларускага народнага сходу. З іх 75,2 працэнта прадстаўлены актывам БРСМ з ліку працуючай моладзі: работнікі прамысловых і сельгаспрадпрыемстваў, служачыя, ваеннаслужачыя Узброеных Сіл Беларусі, супрацоўнікі органаў і падраздзяленняў унутраных спраў МУС, беларускія ратавальнікі, педагогі, прадстаўнікі аховы здароўя, сродкаў масавай інфармацыі, лідары тэрытарыяльных арганізацый саюза моладзі. 15,6 працэнта - студэнты ўстаноў вышэйшай адукацыі і магістранты, прадстаўнікі ССНУ. 9,2 працэнта - дэпутаты раённых Саветаў дэпутатаў, члены маладзёжных парламентаў розных узроўняў і спартсмены. Дарэчы, рэзерв мы таксама сфарміравалі", - адзначыў першы сакратар ЦК БРСМ.
Дзмітрый Варанюк падкрэсліў, што Усебеларускаму народнаму сходу папярэднічала работа соцень маладзёжных дыскусійных пляцовак па ўсёй краіне. "Мы дыскутавалі з юнакамі і дзяўчатамі на самыя розныя тэмы - ад першага працоўнага месца, фарміравання ўмоў працы і заработнай платы, даступнага жылля, інфармацыйных і сацыяльных тэхналогій, да выхавання сапраўднага грамадзяніна-патрыёта сваёй краіны, які будзе любіць Беларусь, беражліва захоўваць, развіваць і перадаваць сваім дзецям і ўнукам яе традыцыі", - дадаў ён.
VI Усебеларускі народны сход пройдзе 11-12 лютага 2021 года ў Мінску. На абмеркаванне ўдзельнікаў будуць вынесены асноўныя палажэнні праграмы сацыяльна-эканамічнага развіцця Беларусі на 2021-2025 гады і напрамкі грамадска-палітычнага развіцця краіны. Агульная колькасць удзельнікаў і запрошаных складзе 2,7 тыс. чалавек.-0-
