13 мая, Мінск /Кар. БЕЛТА/. Прэзідэнт Беларусі Аляксандр Лукашэнка сёння падпісаў указ нумар 184 "Аб невыкарыстоўваемых і непрыдатных для эксплуатацыі аб'ектах былых ваенных гарадкоў". Дакумент выдадзены ў мэтах удасканалення парадку распараджэння такімі аб'ектамі ўзамен указа нумар 428 ад 17 жніўня 2010 года. Аб гэтым БЕЛТА паведамілі ў прэс-службе кіраўніка дзяржавы.
У прыватнасці, падпісаным указам прадастаўляецца права аблвыканкамам і Мінскаму гарвыканкаму вызначаць пералікі ўсіх невыкарыстоўваемых і непрыдатных для эксплуатацыі аб'ектаў ваенных гарадкоў, размешчаных на іх тэрыторыі. Для забеспячэння празрыстасці працэдуры фарміравання такіх пералікаў устаноўлены крытэрыі, якія прымяняюцца пры гэтым.
Дзяржаўныя арганізацыі вызваляюцца ад падаткаў на зямлю і нерухомую маёмасць адносна невыкарыстоўваемых аб'ектаў былых ваенных гарадкоў, якія нямэтазгодна ўключаць у гаспадарчы абарот або зносіць.
Калі ў веданні або кіраванні дзяржаўнай арганізацыі знаходзяцца аб'екты былых ваенных гарадкоў, якія запланаваны да ўключэння ў абарот або зносу, па рашэнні мясцовых органаў улады такія арганізацыі могуць вызваляцца ад зямельнага падатку на занятыя гэтымі аб'ектамі ўчасткі на тэрмін да пяці гадоў.-0-
